Leviticus 15

Exodus  «  Leviticus 14  ‹  Leviticus 15  ›  Leviticus 16  »  Numbers

ՄԱՐՄՆԱԿԱՆ ԱՆՄԱՔՐՈՒԹԻՒՆ՝ ԾՈՐՈՒՄԻ ՊԱՏՃԱՌՈՎ

Տէրը խօսեցաւ Մովսէսի ու Ահարոնի՝ ըսելով.

«Խօսեցէ՛ք, Իսրայէլի որդիներուն եւ ըսէ՛ք անոնց. “Երբ մարդ մը իր մարմինէն ծորում ունենայ, իր ծորումին համար անմաքուր կ’ըլլայ։

Իր ծորումին ատեն իր անմաքրութիւնը սա՛ պիտի ըլլայ. իր մարմինը իր ծորումը հոսեցնէ կամ իր մարմինը իր ծորումը խցանէ, սա՛ է իր անմաքրութիւնը.—

ամէն անկողին՝ որուն վրայ ծորում ունեցողը կը պառկի՝ անմաքուր է, եւ ամէն առարկայ՝ որուն վրայ ան կը նստի՝ անմաքուր պիտի ըլլայ։

Անոր անկողինին դպչողը իր հագուստները թող լուայ, ի՛նք ալ ջուրով լուացուի, ու մինչեւ իրիկուն անմաքուր ըլլայ։

Ա՛ն որ նստի առարկայի մը վրայ՝ որուն վրայ ծորում ունեցող մը նստեր է, իր հագուստները թող լուայ, ի՛նք ալ ջուրով լուացուի եւ մինչեւ իրիկուն անմաքուր ըլլայ։

Ծորում ունեցողին մարմինին դպչողը իր հագուստները թող լուայ, ի՛նք ալ ջուրով լուացուի, ու մինչեւ իրիկուն անմաքուր ըլլայ։

Եթէ ծորում ունեցողը մաքուր մարդու մը վրայ թքնէ, ասիկա իր հագուստները թող լուայ, ի՛նք ալ ջուրով լուացուի, եւ մինչեւ իրիկուն անմաքուր ըլլայ։

Ամէն թամբ՝ որուն վրայ ծորում ունեցողը կը հեծնէ, անմաքուր պիտի ըլլայ։

Ո՛վ որ անոր տակ եղած որեւէ բանին դպչի՝ մինչեւ իրիկուն անմաքուր պիտի ըլլայ. այդ բաները վերցնողը իր հագուստները թող լուայ, ի՛նք ալ ջուրով լուացուի, ու մինչեւ իրիկուն անմաքուր ըլլայ։

Ծորում ունեցողը իր ձեռքերը ջուրով չցօղուած՝ որուն որ դպչի, ան իր հագուստները թող լուայ, ի՛նք ալ ջուրով լուացուի, եւ մինչեւ իրիկուն անմաքուր ըլլայ։

Ծորում ունեցողին դպած ¹խեցիէ անօթը թող կոտրուի, ու ամէն փայտէ անօթ ջուրով թող ցօղուուի։

Երբ ծորում ունեցողը իր ծորումէն մաքրուած ըլլայ, իր մաքրուելուն համար եօթը օր թող հաշուէ, յետոյ իր հագուստները լուայ եւ մարմինը կենսաւէտ ջուրի մէջ լուայ, ու մաքրուած պիտի ըլլայ։

Ութերորդ օրը իրեն համար երկու տատրակ կամ աղաւնիի երկու ձագ թող առնէ, Տէրոջ առջեւ Հանդիպումի վրանին մուտքը գայ եւ զանոնք քահանային տայ։

Քահանան անոնցմէ մէկը իբր մեղքի պատարագ թող ընծայէ, ու միւսը՝ իբր ողջակէզ. քահանան Տէրոջ առջեւ թող քաւութիւն ընէ անոր՝ իր ծորումին համար։

Եթէ մարդու մը զուգաւորութեան սերմը իրմէ ելլէ, իր ամբողջ մարմինը ջուրով թող լուայ, եւ մինչեւ իրիկուն անմաքուր ըլլայ։

Ամէն հագուստ ու ամէն մորթ՝ որուն վրայ զուգաւորութեան սերմ կայ, ջուրով թող լուացուի, եւ մինչեւ իրիկուն անմաքուր ըլլայ։

Երբ մարդ մը կնոջ մը հետ զուգաւորուելու համար պառկի, անոնք երկուքն ալ ջուրով թող լուացուին, ու մինչեւ իրիկուն անմաքուր ըլլան։

Եթէ կին մը ծորում ունենայ եւ իր մարմինին ծորումը արիւն է, եօթը օր իր կեղտոտութեան մէջ թող ²մնայ. ո՛վ որ անոր դպչի՝ մինչեւ իրիկուն անմաքուր պիտի ըլլայ։

Անոր կեղտոտութեան ատենը ի՛նչ բանի վրայ որ պառկի՝ անմաքուր պիտի ըլլայ. նաեւ ի՛նչ բանի վրայ որ նստի՝ անմաքուր պիտի ըլլայ։

Ո՛վ որ անոր անկողինին դպչի՝ իր հագուստները թող լուայ, ի՛նք ալ ջուրով լուացուի, եւ մինչեւ իրիկուն անմաքուր ըլլայ։

Ո՛վ որ դպչի որեւէ առարկայի՝ որուն վրայ ան նստեր է, իր հագուստները թող լուայ, ի՛նք ալ ջուրով լուացուի, ու մինչեւ իրիկուն անմաքուր ըլլայ։

Անոր անկողինին վրայ եղող բանի մը դպչողը, կամ առարկայի մը՝ որուն վրայ ան կը նստի, մինչեւ իրիկուն անմաքուր պիտի ըլլայ։

Եթէ մարդ մը անոր հետ պառկի եւ անոր կեղտը իր վրայ ըլլայ, ինք եօթը օր անմաքուր պիտի ըլլայ, ու ամէն անկողին՝ որուն վրայ ինք պառկի՝ անմաքուր պիտի ըլլայ։

Եթէ կին մը՝ իր ³դաշտանի ատենէն դուրս՝ շատ օրեր իր արիւնին ծորումը ունենայ, կամ ան իր դաշտանի ատենէն աւելի հոսի, իր անմաքրութեան ծորումին բոլոր օրերը անմաքուր պիտի ըլլայ՝ իր դաշտանի օրերուն պէս։

Անոր ծորումին բոլոր օրերը, ամէն անկողին՝ որուն վրայ կը պառկի՝ իր դաշտանի անկողինին պէս պիտի ըլլայ իրեն, եւ ինչ բանի վրայ որ կը նստի՝ իր դաշտանի անմաքրութեան պէս անմաքուր պիտի ըլլայ։

Ո՛վ որ անոնց դպչի՝ անմաքուր պիտի ըլլայ. իր հագուստները թող լուայ, ի՛նք ալ ջուրով լուացուի, ու մինչեւ իրիկուն անմաքուր ըլլայ։

Իսկ եթէ իր ծորումէն մաքրուած է, եօթը օր թող հաշուէ եւ անկէ ետք մաքրուած պիտի ըլլայ։

Ութերորդ օրը իրեն համար երկու տատրակ կամ աղաւնիի երկու ձագ թող առնէ ու զանոնք քահանային բերէ՝ Հանդիպումի վրանին մուտքը։

Քահանան մէկը իբր մեղքի պատարագ թող ընծայէ, եւ միւսը՝ իբր ողջակէզ. քահանան Տէրոջ առջեւ թող քաւութիւն ընէ անոր՝ իր անմաքրութեան ծորումին համար”։

Այսպէս Իսրայէլի որդիները ⁴զգուշացուցէ՛ք իրենց անմաքրութենէն, որպէսզի իրենց անմաքրութեան մէջ չմեռնին՝ իրենց մէջ եղող իմ խորանս պղծելով։

Ծորում ունեցողին, իրմէ զուգաւորութեան սերմը ելլելով անմաքուր եղողին,

իր դաշտանով ուժաթափ եղող կնոջ, ծորում ունեցող ⁵մարդուն կամ կնոջ՝՝, եւ անմաքուր կնոջ հետ պառկող մարդուն օրէնքը այս է»։