Leviticus 18

Exodus  «  Leviticus 17  ‹  Leviticus 18  ›  Leviticus 19  »  Numbers

ԱՊՕՐԻՆԻ ԱՄՈՒՍՆՈՒԹԵԱՆ ԱՐԳԵԼՔ

Տէրը խօսեցաւ Մովսէսի՝ ըսելով.

«Խօսէ՛ Իսրայէլի որդիներուն եւ ըսէ՛ անոնց. “Ե՛ս եմ Եհովան՝ ձեր Աստուածը։

Մի՛ ընէք այնպէս, ինչպէս կ’ընէին Եգիպտոսի երկրին մէջ՝ ուր բնակեցաք. մի՛ ընէք այնպէս, ինչպէս կ’ընեն Քանանի երկրին մէջ՝ ուր ձեզ կը տանիմ, ու անոնց կանոններով մի՛ ընթանաք։

Ի՛մ ¹դատավճիռներս գործադրեցէք եւ ի՛մ կանոններս պահեցէք, որպէսզի անոնցմո՛վ ընթանաք։ Ե՛ս եմ Տէրը՝ ձեր Աստուածը։

Ուստի ի՛մ կանոններս եւ ի՛մ դատավճիռներս պահեցէք. զանոնք գործադրող մարդը անոնցմով պիտի ապրի. ե՛ս եմ Տէրը։

Ձեզմէ ո՛չ մէկը իր ²ամենամօտ արենակիցին թող մերձենայ՝ անոր մերկութիւնը բանալու համար. ե՛ս եմ Տէրը։

Հօրդ մերկութիւնը կամ մօրդ մերկութիւնը մի՛ բանար. ան մայրդ է, անոր մերկութիւնը մի՛ բանար։

³Հօրդ կնոջ՝՝ մերկութիւնը մի՛ բանար. ան հօրդ մերկութիւնն է։

Հօրդ աղջիկին կամ մօրդ աղջիկին՝ քու ⁴քրոջդ մերկութիւնը — տան մէջ ծնած ըլլայ թէ դուրսը ծնած —, անոր մերկութիւնը մի՛ բանար։

Որդիիդ աղջիկին կամ աղջիկիդ աղջիկին մերկութիւնը — անոնց մերկութիւնը — մի՛ բանար, որովհետեւ անոնց մերկութիւնը քուկդ է։

Հօրդ կնոջ աղջիկին մերկութիւնը — հօրմէդ ծնած քու քոյրդ ըլլալով — անոր մերկութիւնը մի՛ բանար։

Հօրդ քրոջ մերկութիւնը մի՛ բանար. ան հօրդ արենակից է։

Մօրդ քրոջ մերկութիւնը մի՛ բանար, որովհետեւ ան մօրդ արենակից է։

Հօրդ եղբօր մերկութիւնը մի՛ բանար, անոր կնոջ մի՛ մերձենար. ան հօրաքոյրդ կը համարուի։

Հարսիդ մերկութիւնը մի՛ բանար. ան որդիիդ կինն է, անոր մերկութիւնը մի՛ բանար։

Եղբօրդ կնոջ մերկութիւնը մի՛ բանար. ան եղբօրդ մերկութիւնն է։

Կնոջ մը եւ անոր աղջիկին մերկութիւնը մի՛ բանար. անոր որդիին աղջիկը կամ անոր աղջիկին աղջիկը մի՛ առներ՝ անոնց մերկութիւնը բանալու համար. անոնք անոր արենակից են, ատիկա լրբութիւն է։

Կին մը իր քրոջ հետ մի՛ առներ՝ զինք թշնամացնելու համար, իր մերկութիւնը բանալով միւսին քով՝ անոր կեանքի ընթացքին։

Իր դաշտանին անմաքրութեան ատեն մի՛ մերձենար կնոջ մը՝ անոր մերկութիւնը բանալու համար։

Զուգաւորութեան համար դրացիիդ կնոջ հետ մի՛ պառկիր՝ անոր հետ անմաքուր ըլլալով։

Քու զարմէդ Մողոքի համար կրակէ անցընել մի՛ թոյլատրեր, ու քու Աստուծոյդ անունը մի՛ պղծեր. ե՛ս եմ Տէրը։

Արուի հետ մի՛ պառկիր՝ կնոջ հետ պառկելու պէս. ատիկա գարշութիւն է։

Ո՛չ մէկ անասունի հետ զուգաւորուէ՝ անոր հետ անմաքուր ըլլալով։ Ո՛չ մէկ կին թող կայնի անասունի մը առջեւ՝ անոր հետ ⁵զուգաւորուելու համար. ատիկա խառնակութիւն է։

Այս բաներէն ո՛չ մէկով անմաքուր եղէք, որովհետեւ բոլոր ասոնցմով անմաքուր եղան այն ազգերը՝ որ ձեր առջեւէն պիտի վտարեմ։

Այդ երկիրը անմաքուր եղած է. անոր անօրէնութիւնը պիտի հատուցանեմ իրեն, ու երկիրը իր բնակիչները պիտի փսխէ։

Ուստի դուք ի՛մ կանոններս եւ ի՛մ դատավճիռներս պահեցէք։ Այս գարշութիւններէն ո՛չ մէկը գործեցէք, ո՛չ բնիկը, ո՛չ ալ ձեր մէջ պանդխտացած գաղթականը

— որովհետեւ այդ երկրին մարդիկը՝ ձեզմէ առաջ այս բոլոր գարշութիւնները գործեցին, ու երկիրը անմաքուր եղաւ —,

որպէսզի երկիրը ձեզ ալ չփսխէ՝ երբ զայն անմաքուր ընէք, ինչպէս ձեզմէ առաջ եղած ազգերը փսխեց։

Արդարեւ ո՛վ որ այս գարշութիւններէն որեւէ մէկը գործէ, զայն ընող անձերը իրենց ժողովուրդին մէջէն պիտի բնաջնջուին։

Ուստի ի՛մ հրահանգներս պահեցէք, որպէսզի ձեզմէ առաջ գործադրուած այս գարշելի սովորութիւններէն ո՛չ մէկը ընէք, եւ անոնցմով անմաքուր չըլլաք։ Ե՛ս եմ Տէրը՝ ձեր Աստուածը”»։