Leviticus 20

Exodus  «  Leviticus 19  ‹  Leviticus 20  ›  Leviticus 21  »  Numbers

ԱՆՀՆԱԶԱՆԴՈՒԹԵԱՆ ՊԱՏԻԺՆԵՐԸ

Տէրը խօսեցաւ Մովսէսի՝ ըսելով.

«Իսրայէլի որդիներուն նաեւ ըսէ՛. “Իսրայէլի որդիներէն եւ Իսրայէլի մէջ պանդխտացած գաղթականներէն ո՛վ որ իր ¹զաւակներէն մէկը Մողոքի տայ, անշո՛ւշտ պիտի մեռցուի. երկրին ժողովուրդը թող ²քարկոծէ զայն։

Իսկ ես՝ իմ երեսս այդ մարդուն դէմ պիտի դարձնեմ ու զայն իր ժողովուրդին մէջէն բնաջնջեմ, որովհետեւ ան իր ³զաւակներէն մէկը Մողոքի տուած է՝ իմ սրբարանս պղծելու եւ իմ սուրբ անունս անարգելու համար։

Եթէ այդ մարդը իր ⁴զաւակներէն մէկը Մողոքի տուած ատեն՝ երկրին ժողովուրդը իր աչքերէն թաքուն պահէ ու զայն չմեռցնէ,

ե՛ս իմ երեսս այդ մարդուն դէմ եւ անոր գերդաստանին դէմ պիտի դարձնեմ, ու զայն եւ Մողոքի հետ պոռնկելու համար այդ մարդուն պէս բոլոր պոռնկողները իրենց ժողովուրդին մէջէն պիտի բնաջնջեմ։

Եթէ անձ մը վհուկներուն եւ նշանագէտներուն դառնայ՝ անոնց հետ պոռնկելու համար, այդ անձին դէմ պիտի դարձնեմ երեսս ու զայն իր ժողովուրդին մէջէն պիտի բնաջնջեմ։

Ուստի դուք ձեզ սրբացուցէ՛ք եւ սո՛ւրբ եղէք, քանի որ ե՛ս եմ Տէրը՝ ձեր Աստուածը։

Իմ կանոններս պահեցէ՛ք ու զանոնք գործադրեցէ՛ք. ե՛ս եմ Տէրը՝ որ ձեզ կը սրբացնեմ։

Ո՛վ որ իր հայրը կամ մայրը անիծէ, անշո՛ւշտ պիտի մեռցուի. ան իր հայրը կամ մայրը անիծեց, անոր արիւնը իր վրայ ըլլայ։

Ո՛վ որ ուրիշ մարդու մը կնոջ հետ շնութիւն ընէ, այսինքն իր ընկերին կնոջ հետ շնութիւն ընողը՝ անշո՛ւշտ պիտի մեռցուի. շնացո՛ղն ալ, շնացեա՛լն ալ պիտի մեռցուին։

Ո՛վ որ իր ⁵հօր կնոջ՝՝ հետ պառկի, իր հօր մերկութիւնը կը բանայ. անշո՛ւշտ երկուքն ալ պիտի մեռցուին, անոնց արիւնը իրենց վրայ ըլլայ։

Եթէ մարդ մը իր հարսին հետ պառկի, անշո՛ւշտ երկուքն ալ պիտի մեռցուին. խառնակութիւն գործեցին, անոնց արիւնը իրենց վրայ ըլլայ։

Եթէ մարդ մը կնոջ մը հետ պառկելու պէս արուի հետ պառկի, երկուքն ալ գարշութիւն կը գործեն. անշո՛ւշտ պիտի մեռցուին, անոնց արիւնը իրենց վրայ ըլլայ։

Եթէ մարդ մը՝ կին մը եւ անոր մայրը առնէ, լրբութիւն է. ի՛նք ալ, անո՛նք ալ կրակով պիտի այրուին, որպէսզի ձեր մէջ լրբութիւն չըլլայ։

Եթէ մարդ մը անասունի հետ զուգաւորուի, անշո՛ւշտ պիտի մեռցուի. անասունն ալ սպաննեցէ՛ք։

Եթէ կին մը որեւէ անասունի հետ ⁶զուգաւորուելու համար անոր մերձենայ, մեռցո՛ւր կինը, եւ անասունն ալ։ Անոնք անշո՛ւշտ պիտի մեռցուին, անոնց արիւնը իրենց վրայ ըլլայ։

Եթէ մարդ մը իր ⁷քոյրը առնէ, իր հօր աղջիկը կամ իր մօր աղջիկը, ու անոր մերկութիւնը տեսնէ եւ աղջիկն ալ անոր մերկութիւնը տեսնէ, անպատուութիւն է. անոնք իրենց ժողովուրդին որդիներուն աչքերուն առջեւ պիտի բնաջնջուին. ան իր քրոջ մերկութիւնը բացաւ, իր անօրէնութիւնը պիտի կրէ։

Եթէ մարդ մը իր դաշտանին մէջ եղող կնոջ մը հետ պառկի ու անոր մերկութիւնը բանայ, ինք անոր աղբիւրը բացաւ, կինն ալ իր արիւնին աղբիւրը բացաւ. երկուքն ալ իրենց ժողովուրդին մէջէն պիտի բնաջնջուին։

Մօրդ քրոջ կամ հօրդ քրոջ մերկութիւնը մի՛ բանար. որովհետեւ եթէ մէկը իր արենակիցին մերկութիւնը բանայ, երկուքն ալ իրենց անօրէնութիւնը պիտի կրեն։

Եթէ մարդ մը իր հօրեղբօր կնոջ հետ պառկի, իր հօրեղբօր մերկութիւնը կը բանայ. անոնք իրենց մեղքը պիտի կրեն, անզաւակ պիտի մեռնին։

Եթէ մարդ մը իր եղբօր կինը առնէ, կեղտոտութիւն է. ան իր եղբօր մերկութիւնը կը բանայ, անզաւակ պիտի ըլլան։

Ուստի իմ բոլոր կանոններս եւ բոլոր ⁸դատավճիռներս պահեցէ՛ք ու զանոնք գործադրեցէ՛ք, որպէսզի այն երկիրը՝ ուր ձեզ պիտի տանիմ որ հոն բնակիք՝ չփսխէ ձեզ։

Մի՛ ընթանաք այն ազգերուն սովորութիւններուն համաձայն, որ ձեր առջեւէն պիտի վտարեմ. արդարեւ այս բոլոր բաները ըրին անոնք, ու ես զզուեցայ անոնցմէ

եւ ըսի ձեզի. "Անոնց ⁹հողերը դո՛ւք պիտի ժառանգէք՝՝, ու ես զայն ձեզի պիտի տամ որ անոր տիրանաք, երկիր մը՝ որ կաթ ու մեղր կը հոսեցնէ"։ Ե՛ս եմ Տէրը՝ ձեր Աստուածը, որ բոլոր ազգերէն զատեցի ձեզ։

Ուստի զանազանեցէ՛ք մաքուր անասունները անմաքուրներէն, եւ անմաքուր թռչունները մաքուրներէն, ու ձեր անձերը մի՛ պղծէք անասուններով, կամ թռչուններով, կամ գետինի վրայի որեւէ սողունով, որ ե՛ս զատեցի ձեզի իբր անմաքուր։

Սո՛ւրբ եղէք ինծի. քանի որ ես՝ Տէրս՝ սուրբ եմ, ու ձեզ միւս ազգերէն զատեցի՝ որպէսզի իմս ըլլաք։

Վհուկ կամ նշանագէտ եղողը, այր մարդ ըլլայ թէ կին, անշո՛ւշտ պիտի մեռցուի. թող քարկոծեն զանոնք, անոնց արիւնը իրենց վրայ ըլլայ”»։