Leviticus 21

Exodus  «  Leviticus 20  ‹  Leviticus 21  ›  Leviticus 22  »  Numbers

ՔԱՀԱՆԱՆԵՐՈՒՆ ՍՐԲՈՒԹԻՒՆԸ

Տէրը Մովսէսի ըսաւ. «Խօսէ՛ Ահարոնի որդիներուն՝ քահանաներուն՝ եւ ըսէ՛ անոնց. “Քահանայ մը անձի մը մահուան համար թող անմաքուր չըլլայ իր ժողովուրդին մէջ,

բացի իր մօտ արենակիցին համար, այսինքն՝ իր մօր, հօր, որդիին, աղջիկին ու եղբօր համար,

նաեւ իր կոյս քրոջ համար, որ մօտ է իրեն եւ ամուսնացած չէ. անոր համար կրնայ անմաքուր ըլլալ։

Իբր գլխաւոր մարդ իր ժողովուրդին մէջ՝ ան թող անմաքուր չըլլայ, որպէսզի ինքզինք չպղծէ։

Անոնք իրենց գլուխը թող չկնտեն, մօրուքին եզերքը չածիլեն ու մարմինը չկտրատեն։

Սուրբ թող ըլլան իրենց Աստուծոյն. իրենց Աստուծոյն անունը թող չպղծեն, որովհետեւ իրե՛նք կը մատուցանեն Տէրոջ պատարագները եւ իրենց Աստուծոյն հացը. ուստի սուրբ թող ըլլան։

Պոռնիկ կամ պղծուած կին թող չառնեն, ո՛չ ալ իր ամուսինէն վռնտուած կին մը առնեն. որովհետեւ քահանան սուրբ է իր Աստուծոյն”։

Ուստի սրբացո՛ւր զայն, քանի որ ի՛նք կը մատուցանէ քու Աստուծոյդ հացը. ան սուրբ պիտի ըլլայ քեզի, որովհետեւ ես՝ Տէրս, որ ձեզ կը սրբացնեմ, սուրբ եմ։

Եթէ քահանայի մը աղջիկը պոռնկելով ինքզինք պղծէ, իր հա՛յրը կը պղծէ. ան կրակով պիտի այրուի։

Իսկ իր եղբայրներուն մէջ եղող քահանայապետը, որուն գլուխին վրայ օծումի իւղը թափուած է եւ սուրբ հագուստները հագնելու համար նուիրուած է, իր գլուխը թող չբանայ, հագուստները թող չպատռէ,

ո՛չ մէկ մեռած անձի քով թող երթայ, ո՛չ ալ իր հօր կամ մօր համար անմաքուր ըլլայ։

Սրբարանէն դուրս թող չելլէ ու իր Աստուծոյն սրբարանը թող չպղծէ, որովհետեւ իր Աստուծոյն օծումի իւղին պսակը իր վրայ է. ե՛ս եմ Տէրը։

Ան կոյս մը թող առնէ իբր կին.

այրի, կամ վռնտուած կին, կամ պղծուած, կամ պոռնիկ թող չառնէ, հապա իր ժողովուրդէն կոյս մը թող առնէ իբր կին.

որպէսզի իր զարմը չպղծէ իր ժողովուրդին մէջ, որովհետեւ ե՛ս եմ Տէրը՝ որ զայն կը սրբացնեմ»։

Տէրը խօսեցաւ Մովսէսի՝ ըսելով.

«Խօսէ՛ Ահարոնի եւ ըսէ՛. “Քու զարմէդ իրենց սերունդներուն մէջ ո՛վ որ իր վրայ արատ մը ունենայ, թող չմօտենայ իր Աստուծոյն հացը մատուցանելու.

որովհետեւ արատ ունեցող մարդ մը պէտք չէ մօտենայ, այսինքն՝ կոյր մարդը, կամ կաղը, կամ ¹կարճունչը, կամ իր անդամներուն մէջ ²աւելորդ բան մը ունեցողը՝՝,

կամ ոտքը կոտրած մարդը, կամ ձեռքը կոտրածը,

կամ կուզը, կամ թզուկը, կամ իր աչքին մէջ բիծ ունեցողը, կամ քոսոտը, կամ որքիւնոտը, կամ ³փոշտանկը”։

Ահարոն քահանային զարմէն արատ ունեցող ո՛չ մէկ մարդ թող մօտենայ՝ Տէրոջ պատարագները մատուցանելու. արդարեւ արատաւոր ըլլալով՝ պէտք չէ մօտենայ իր Աստուծոյն հացը մատուցանելու։

Ան իր Աստուծոյն հացը թող ուտէ, թէ՛ ամենասուրբ բաներէն եւ թէ սուրբ բաներէն.

միայն թէ վարագոյրին քով թող չերթայ ու զոհասեղանին չմօտենայ, որովհետեւ արատ ունի, որպէսզի իմ սուրբ բաներս չպղծէ. քանի որ ե՛ս եմ Տէրը՝ որ զանոնք կը սրբացնեմ»։

Մովսէս այս բաները ըսաւ Ահարոնի ու անոր որդիներուն, եւ Իսրայէլի բոլոր որդիներուն։