Leviticus 22

Exodus  «  Leviticus 21  ‹  Leviticus 22  ›  Leviticus 23  »  Numbers

ԶՈՀԵՐՈՒՆ ՍՐԲՈՒԹԻՒՆԸ

Տէրը խօսեցաւ Մովսէսի՝ ըսելով.

«Խօսէ՛ Ահարոնի ու անոր որդիներուն, որ Իսրայէլի որդիներուն մատուցանած սուրբ բաներէն ¹զգուշանան, եւ իմ սուրբ անունս չպղծեն այն բաներով՝ որ ինծի կը սրբացնեն. ե՛ս եմ Տէրը։

Ըսէ՛ անոնց. “Ձեր ամբողջ զարմէն ձեր սերունդներուն մէջ՝ ո՛վ որ իր անմաքրութիւնը իր վրայ ունենալով մօտենայ այն սուրբ բաներուն, որ Իսրայէլի որդիները կը սրբացնեն Տէրոջ, այդ անձը իմ ներկայութենէս պիտի ²կտրուի. ե՛ս եմ Տէրը”։

Ո՛վ որ Ահարոնի զարմէն բորոտ ըլլայ, կամ ծորում ունենայ, սուրբ բաներէն թող չուտէ մինչեւ իր մաքրուած ըլլալը. նաեւ ո՛վ որ ³մեռելէ անմաքուր եղած բանի մը դպչի, կամ այն մարդը՝ որուն զուգաւորութեան սերմը իրմէ ելած է,

կամ ո՛վ որ դպչի որեւէ զեռունի մը՝ որով կրնայ անմաքուր ըլլալ, կամ մարդու մը՝ որմէ կրնայ անմաքուր ըլլալ, ի՛նչ ալ ըլլայ անոր անմաքրութիւնը։

Ասոնց դպչող անձը մինչեւ իրիկուն անմաքուր պիտի ըլլայ. սուրբ բաներէն թող չուտէ, հապա իր մարմինը ջուրով լուայ։

Բայց երբ արեւը մայր մտնէ՝ մաքրուած պիտի ըլլայ. յետոյ սուրբ բաներէն թող ուտէ, որովհետեւ ան իր հացն է։

Մեռած մը կամ գազանէ բզքտուած մը թող չուտէ, որպէսզի անով անմաքուր չըլլայ. ե՛ս եմ Տէրը։

Ուստի իմ հրահանգս թող պահեն, որպէսզի անոր համար մեղք չկրեն ու եթէ զայն պղծեն՝ չմեռնին։ Ե՛ս եմ Տէրը՝ որ զանոնք կը սրբացնեմ։

Ո՛չ մէկ օտար սուրբ բանէ թող ուտէ. քահանային հիւրը կամ վարձկանն ալ սուրբ բանէ թող չուտէ։

Բայց եթէ քահանան իր դրամով անձ մը գնած է, ան թող ուտէ անկէ, նաեւ իր տունը ծնածը. անոնք թող ուտեն իր հացէն։

Եթէ քահանային աղջիկը օտար մարդու մը հետ ամուսնանայ, սուրբ բաներէն բարձրացնելիք ընծաներէն թող չուտէ։

Բայց եթէ քահանային աղջիկը այրի կամ վռնտուած է, ⁴զաւակ չունի եւ իր հօր տունը վերադարձած է, իր մանկութեան ժամանակին պէս իր հօր հացէն թող ուտէ. սակայն ո՛չ մէկ օտար անկէ թող ուտէ։

Եթէ մարդ մը սխալմամբ սուրբ բանէ մը ուտէ, անոր արժէքին վրայ մէկ հինգերորդը թող աւելցնէ ու սուրբ բանին հետ քահանային տայ.

Քահանաները Իսրայէլի որդիներուն Տէրոջ մատուցանած սուրբ բաները թող չպղծեն,

⁵եւ իրենց սուրբ բաները ուտելով՝ յանցանքի անօրէնութիւնը իրենց վրայ թող չկրեն՝՝, որովհետեւ ե՛ս եմ Տէրը՝ որ զանոնք կը սրբացնեմ»։

Տէրը խօսեցաւ Մովսէսի՝ ըսելով.

«Խօսէ՛ Ահարոնի ու անոր որդիներուն, եւ Իսրայէլի բոլոր որդիներուն, ու ըսէ՛ անոնց. Իսրայէլի տունէն կամ Իսրայէլի մէջ բնակող պանդուխտներէն ո՛վ որ իր մատաղը մատուցանէ՝ իր բոլոր ուխտերուն եւ բոլոր յօժարակամ ընծաներուն համար,— որ Տէրոջ կը մատուցանեն իբր ողջակէզ,—

արու եւ անարատ արջառ մը, ոչխար մը կամ այծ մը թող մատուցանէ, որպէսզի ⁶ընդունելի ըլլայ՝՝։

Ո՛չ մէկ արատ ունեցող մատուցանեցէք, որովհետեւ ընդունելի չ’ըլլար ձեզի համար։

Ուխտ կատարելու համար, կամ յօժարակամ ընծայի համար, ո՛վ որ արջառներէն կամ ոչխարներէն Տէրոջ խաղաղութեան զոհ մատուցանէ, զոհը անարատ թող ըլլայ՝ որպէսզի ընդունուի. ո՛չ մէկ արատ թող ըլլայ անոր վրայ։

Կոյր, կամ մէկ անդամը կոտրած կամ կտրուած, կամ խաղաւարտ ունեցող, կամ քոսոտ, կամ որքիւնոտ եղողներէն Տէրոջ մի՛ մատուցանէք, ո՛չ ալ ասոնցմէ սեղանին վրայ դրէք՝ Տէրոջ պատարագի համար։

Իր անդամներուն մէջ աւելորդ կամ պակաս բան մը ունեցող արջառը կամ ոչխարը կրնաս ընծայել յօժարակամ ընծայի համար, սակայն ան պիտի չընդունուի ուխտի համար։

Ամորձիքը ⁷ճմլուածը, կամ ⁸ճզմուածը, կամ փրցուածը, կամ կտրուածը մի՛ մատուցանէք Տէրոջ, ու ձեր երկրին մէջ մի՛ ընէք ասիկա։

Ասոնցմէ որեւէ մէկը օտարաազգիի մը ձեռքէն ալ ձեր Աստուծոյն ⁹պատարագ մի՛ մատուցանէք, որովհետեւ անոնց մէջ ապականութիւն եւ արատներ կան. անոնք ընդունելի պիտի չըլլան ձեզի համար»։

Տէրը խօսեցաւ Մովսէսի՝ ըսելով.

«Երբ արջառ կամ ոչխար կամ այծ ծնի, եօթը օր իր մօր քով թող մնայ. ութերորդ օրը եւ անկէ ետք Տէրոջ ընդունելի պիտի ըլլայ պատարագի մատաղի համար։

Կովը կամ ոչխարը իր ձագին հետ մէկ օրուան մէջ մի՛ մորթէք։

Երբ շնորհակալութեան զոհ մատուցանէք Տէրոջ, ա՛յնպէս մատուցանեցէք՝ որ ընդունելի ըլլայ ձեզի համար։

Ան թող ուտուի նո՛յն օրը, անկէ մինչեւ առտու մի՛ թողուք. ե՛ս եմ Տէրը։

Ուստի իմ պատուիրաններս պահեցէ՛ք ու զանոնք գործադրեցէ՛ք. ե՛ս եմ Տէրը։

Եւ իմ սուրբ անունս մի՛ պղծէք, որպէսզի ես սուրբ ըլլամ Իսրայէլի որդիներուն մէջ։ Ե՛ս եմ Տէրը՝ որ ձեզ կը սրբացնեմ,

որ ձեզ Եգիպտոսի երկրէն հանեցի՝ ձեզի Աստուած ըլլալու համար. ե՛ս եմ Տէրը»։