Leviticus 26

Exodus  «  Leviticus 25  ‹  Leviticus 26  ›  Leviticus 27  »  Numbers

ՀՆԱԶԱՆԴՈՒԹԵԱՆ ՕՐՀՆՈՒԹԻՒՆՆԵՐԸ (Բ. Օր. 7. 12-24, 28. 1-14)

«Դուք ձեզի չաստուածներ ու ¹կուռքեր մի՛ շինէք, ձեզի արձաններ մի՛ կանգնեցնէք եւ ձեր երկրին մէջ պատկերազարդ կոթող մի՛ դնէք՝ անոր երկրպագելու համար. որովհետեւ ե՛ս եմ Տէրը՝ ձեր Աստուածը։

Իմ Շաբաթներս պահեցէ՛ք ու սրբարանս յարգեցէ՛ք. ե՛ս եմ Տէրը։

Եթէ իմ կանոններովս ընթանաք եւ պատուիրաններս պահէք ու զանոնք գործադրէք,

ես ալ ձեզի տեղատարափը ատենին պիտի տամ, գետինը իր արգասիքը պիտի տայ եւ դաշտին ծառերը իրենց պտուղը պիտի տան։

Ձեր կամնելը մինչեւ այգեկութը պիտի հասնի, ու այգեկութը մինչեւ սերմանելու ժամանակը պիտի հասնի. ձեր հացը կուշտ պիտի ուտէք եւ ձեր երկրին մէջ ապահովութեամբ պիտի բնակիք։

Խաղաղութիւն պիտի տամ երկրին. հանգիստ պիտի պառկիք ու ո՛չ մէկը ձեզ պիտի դողացնէ. երկրին չար գազանները պիտի ²հատցնեմ, եւ ձեր երկրէն սուր պիտի չանցնի։

Ձեր թշնամիները պիտի հալածէք, եւ անոնք սուրով պիտի իյնան ձեր առջեւ։

Ձեզմէ հինգը՝ հարիւր հոգի պիտի հալածէ, ձեզմէ հարիւրը՝ տասը հազար պիտի հալածէ, ու ձեր թշնամիները սուրով պիտի իյնան ձեր առջեւ։

Ձեզի ³ուշադրութիւն պիտի դարձնեմ, ձեզ պիտի աճեցնեմ եւ բազմացնեմ, ու ձեզի հետ իմ ուխտս պիտի հաստատեմ։

Հին պաշարը պիտի ուտէք, եւ ⁴նորը տեղաւորելու համար՝՝ հինը դուրս պիտի հանէք։

Իմ խորանս ձեր մէջ պիտի դնեմ, եւ իմ անձս ձեզմէ պիտի չզզուի։

Ձեր մէջ պիտի շրջիմ ու ձեր Աստուածը ըլլամ, դուք ալ իմ ժողովուրդս պիտի ըլլաք։

Ե՛ս եմ Տէրը՝ ձեր Աստուածը, որ ձեզ Եգիպտոսի երկրէն հանեցի, որպէսզի անոնց ստրուկ չըլլաք. ձեր լուծին կապերը կոտրեցի եւ ձեզ բարձրագլուխ քալեցուցի»։

ԱՆՀՆԱԶԱՆԴՈՒԹԵԱՆ ՊԱՏԻԺԸ (Բ. Օր. 28. 15-68)

«Բայց եթէ ինծի մտիկ չընէք եւ այս բոլոր պատուիրանները չգործադրէք,

իմ կանոններս անարգէք ու ձեր անձը իմ ⁵դատավճիռներէս զզուի, այնպէս որ իմ բոլոր պատուիրաններս չգործադրէք եւ իմ ուխտս խզէք,

ես ալ ձեզի սա՛ պիտի ընեմ.— ձեր վրայ աչք սպառող եւ ⁶սիրտ մարեցնող արհաւիրք, ծիւրախտ ու տենդախտ պիտի ղրկեմ. ձեր սերմը պարապ տեղը պիտի ցանէք, որովհետեւ ձեր թշնամինե՛րը պիտի ուտեն զայն։

Իմ երեսս ձեր դէմ պիտի դարձնեմ, ու ձեր թշնամիներուն առջեւ պիտի սպաննուիք. ձեզ ատողները պիտի տիրապետեն ձեր վրայ, եւ առանց հալածողի պիտի փախչիք։

Եթէ ասոնցմէ ետք ալ ինծի մտիկ չընէք, ձեր մեղքերուն համար ձեզ եօթնապատիկ աւելի պիտի պատժեմ։

Ձեր զօրութեան ամբարտաւանութիւնը պիտի կոտրեմ. ձեր երկինքը երկաթի պէս պիտի ընեմ, ու ձեր երկիրը՝ պղինձի պէս։

Ձեր ոյժը պարապ տեղը պիտի հատնի. ձեր գետինը իր արգասիքը պիտի չտայ, եւ երկրին ծառերը իրենց պտուղը պիտի չտան։

Եթէ դուք ինծի հակառակիք ու չուզէք ինծի մտիկ ընել, ձեր մեղքերուն համեմատ եօթնապատիկ աւելի պատուհաս պիտի բերեմ ձեր վրայ։

Ձեր վրայ դաշտի գազաններ պիտի ղրկեմ, որոնք ձեր զաւակները պիտի յափշտակեն, ձեր անասունները պիտի կոտորեն, ձեր թիւը պիտի պակսեցնեն, եւ ձեր ճամբաները պիտի ամայանան։

Եթէ ասոնցմով ալ ինձմէ չխրատուիք ու ինծի հակառակիք,

ե՛ս ալ ձեզի պիտի հակառակիմ, ե՛ս ալ ձեր մեղքերուն համար ձեզ եօթնապատիկ պիտի պատժեմ։

Ձեր վրայ ուխտիս վրէժը առնող սուրը պիտի ղրկեմ. երբ ձեր քաղաքներուն մէջ հաւաքուիք, ձեր մէջ ժանտախտ պիտի ղրկեմ եւ թշնամիին ձեռքը պիտի մատնուիք։

Երբ ⁷ձեր հացին գաւազանը կոտրեմ՝՝, տասը կին մէկ փուռի մէջ ձեր հացը պիտի եփեն, ու ձեր հացը կշիռով պիտի վերադարձուի ձեզի. պիտի ուտէք, բայց պիտի չկշտանաք։

Եթէ ասոնցմէ ետք ալ ինծի մտիկ չընէք, հապա ինծի հակառակիք,

ե՛ս ալ ձեզի պիտի հակառակիմ ցասումով, եւ ձեր մեղքերուն համար ձեզ եօթնապատիկ պիտի պատժեմ։

Ձեր որդիներուն միսը պիտի ուտէք, ու ձեր աղջիկներուն միսը պիտի ուտէք։

Ձեր բարձր տեղերը պիտի փլցնեմ, ձեր արեւի սիւնարձանները կոտրտեմ, ձեր դիակները ձեր չաստուածներուն դիակներուն վրայ պիտի դնեմ, եւ իմ անձս ձեզմէ պիտի զզուի։

Ձեր քաղաքները աւերակ պիտի ընեմ, ձեր սրբարանները պիտի ամայացնեմ, ու ձեր անոյշ հոտերուն բուրմունքը պիտի չհոտոտեմ։

Երկիրը պիտի ամայացնեմ, որպէսզի հոն բնակող ձեր թշնամիները ապշին անոր վրայ։

Ձեզ ⁸հեթանոսներուն մէջ պիտի ցրուեմ, եւ ձեր ետեւէն սուր պիտի քաշեմ. ձեր երկիրը պիտի ամայանայ ու ձեր քաղաքները աւերակ պիտի ըլլան։

Ա՛յն ատեն երկիրը իր Շաբաթները պիտի վայելէ՝ որքան ժամանակ որ ամայացած ըլլայ, երբ դուք ձեր թշնամիներուն երկրին մէջ ըլլաք. ա՛յն ատեն երկիրը պիտի հանգստանայ եւ իր Շաբաթները վայելէ։

Որքան ժամանակ որ ամայացած ըլլայ՝ պիտի հանգստանայ, որովհետեւ ձեր Շաբաթներուն մէջ չէր հանգստանար՝ երբ անոր վրայ կը բնակէիք։

Ձեզմէ ողջ մնացածներուն սիրտին երկչոտութիւն պիտի բերեմ իրենց թշնամիներուն երկիրներուն մէջ. հովէն քշուած տերեւի մը ձայնը պիտի հալածէ զանոնք, սուրի առջեւէն փախչելու պէս պիտի փախչին եւ առանց հալածողի պիտի իյնան։

Իրարու վրայ պիտի ⁹իյնան՝ սուրի առջեւէն փախչելու պէս, առանց հալածողի, ու պիտի չկարենաք ձեր թշնամիներուն առջեւ կայնիլ։

Հեթանոսներուն մէջ պիտի կորսուիք, եւ ձեր թշնամիներուն երկիրը ձեզ պիտի ուտէ։

Ձեզմէ մնացածները իրենց անօրէնութեամբ պիտի մաշին ձեր թշնամիներուն երկիրներուն մէջ. նաեւ իրենց հայրերուն անօրէնութիւններով միասին պիտի մաշին։

Եթէ խոստովանին իրենց անօրէնութիւնն ու իրենց հայրերուն անօրէնութիւնը՝ ինծի հանդէպ իրենց ըրած ուխտազանցութիւններով միասին, եւ իրենց ինծի հակառակիլը,

նաեւ իմ անոնց հակառակիլս ու զանոնք իրենց թշնամիներուն երկիրը բերելս. եթէ այն ատեն իրենց անթլփատ սիրտը խոնարհի, եւ այն ատեն իրենց անօրէնութեան պատիժին յօժարին,

պիտի յիշեմ Յակոբի հետ կնքած ուխտս, նաեւ Իսահակի հետ կնքած ուխտս. Աբրահամի հետ կնքած ուխտս ալ պիտի յիշեմ, ու այդ երկիրն ալ պիտի յիշեմ։

Արդարեւ այդ երկիրը պիտի լքուի անոնցմէ եւ իր Շաբաթները պիտի վայելէ, որքան ժամանակ որ ամայացած ըլլայ՝ առանց անոնց. անոնք իրենց անօրէնութեան պատիժին պիտի յօժարին, որովհետեւ իմ դատավճիռներս անարգեցին եւ անոնց անձերը իմ կանոններէս զզուեցան։

Ասոնցմէ ետք ալ, երբ իրենց թշնամիներուն երկիրը ըլլան, զանոնք պիտի չմերժեմ ու անոնցմէ պիտի չզզուիմ՝ զանոնք սպառելու եւ անոնց հետ կնքած ուխտս խզելու չափ. որովհետեւ ե՛ս եմ Տէրը՝ անոնց Աստուածը։

Հապա անոնց սիրոյն համար պիտի յիշեմ իրենց նախնիքներուն ուխտը, որոնք Եգիպտոսի երկրէն հանեցի՝ հեթանոսներուն ¹⁰առջեւ անոնց Աստուած ըլլալու համար։ Ե՛ս եմ Տէրը»։

Ասո՛նք են այն կանոնները, դատավճիռներն ու օրէնքները, որ Տէրը ¹¹հաստատեց իր եւ Իսրայէլի որդիներուն միջեւ՝ Սինա լերան վրայ, Մովսէսի ¹²միջոցով։