Nehemiah 1
Ezra « Ezra 10 ‹ Nehemiah 1 › Nehemiah 2 » Esther
ՆԷԵՄԻԱՅԻ ՄՏԱՀՈԳՈՒԹԻՒՆԸ ԵՐՈՒՍԱՂԷՄԻ ՀԱՄԱՐ
1Աքաղիայի որդիին՝ Նէեմիայի խօսքերը.— Քասղեւ ամսուան մէջ, Արտաշէս թագաւորին քսաներորդ տարին, երբ ես Շուշան մայրաքաղաքն էի,
2եղբայրներէս մէկը՝ Անանի 1Հրէաստանէն եկաւ, ինք եւ քանի մը մարդիկ։ Անոնց հարցուցի ազատուած — գերութենէն ճողոպրած — Հրեաներուն ու Երուսաղէմի մասին։
3Ինծի պատասխանեցին. «Գերութենէն ճողոպրած մնացորդը գաւառին մէջ մեծ ձախորդութեան ու նախատինքի մէջ է. Երուսաղէմի պարիսպը 2քանդուած է, եւ անոր դռները կրակով այրուած են»։
4Երբ այս խօսքերը լսեցի՝ նստայ, լացի, ու քանի մը օր սգացի։ Ապա ծոմ պահելով երկինքի Աստուծոյն 3աղօթեցի
5եւ ըսի. «Ո՛վ 4Տէր, երկինքի՛ Աստուած, մեծ ու ահեղ Աստուած, որ ուխտը կը պահես եւ կարեկից կ’ըլլաս քեզ սիրողներուն ու քու պատուիրաններդ պահողներուն. կ’աղերսե՛մ,
6քու ականջներդ թող ուշադիր ըլլան եւ աչքերդ բաց ըլլան, որպէսզի լսես ծառայիդ աղօթքը, որ ամէն օր՝ ցերեկ ու գիշեր 5քեզի կը մատուցանեմ՝՝, քու ծառաներուդ՝ Իսրայէլի որդիներուն՝ համար, խոստովանելով Իսրայէլի որդիներուն մեղքերը՝ որոնք քեզի դէմ 6գործեցինք։ Արդարեւ թէ՛ ես եւ թէ իմ հօրս տունը մեղանչեցինք.
7քու դէմդ չարիք գործեցինք, ու քու ծառայիդ՝ Մովսէսի 7տուած պատուիրաններդ, կանոններդ եւ 8դատավճիռներդ չպահեցինք։
8Սակայն կ’աղերսե՛մ, յիշէ՛ այն խօսքը որ քու ծառայիդ՝ Մովսէսի 9ըսիր. “Եթէ ուխտազանց ըլլաք՝ ձեզ ժողովուրդներուն մէջ պիտի ցրուեմ.
9իսկ եթէ ինծի վերադառնաք եւ իմ պատուիրաններս պահէք ու զանոնք գործադրէք, ձեզմէ աքսորուածները՝ նոյնիսկ եթէ երկինքի ծայրը ըլլան, զանոնք անկէ պիտի հաւաքեմ եւ այն տեղը պիտի տանիմ՝ որ ընտրեցի իմ անունս հոն բնակեցնելու համար”։
10Անոնք քու մեծ կարողութեամբդ եւ ուժեղ ձեռքովդ ազատած ծառաներդ ու ժողովուրդդ են։
11Ուստի հիմա, ո՛վ Տէր, կ’աղերսե՛մ, քու ականջդ թող ուշադիր ըլլայ ծառայիդ աղօթքին եւ քու անունէդ վախնալէն ախորժող ծառաներուդ աղօթքին. ծառադ այսօր թող յաջողի, ու գթութիւն գտնել տուր անոր այս մարդուն առջեւ»։ Արդարեւ ես թագաւորին մատռուակն էի։