Nehemiah 7

Ezra  «  Nehemiah 6  ‹  Nehemiah 7  ›  Nehemiah 8  »  Esther

Երբ պարիսպը կառուցանուեցաւ եւ դռներուն փեղկերը տեղադրեցի, դռնապանները, երգողներն ու Ղեւտացիները նշանակուեցան։

Եղբայրս՝ Անանին, եւ միջնաբերդին իշխանաւորը՝ Անանիան (որ հաւատարիմ մարդ մըն էր, ու շատերէն աւելի կը վախնար Աստուծմէ) Երուսաղէմի վրայ ¹նշանակեցի,

եւ անոնց ըսի. «Երուսաղէմի դռները թող չբացուին՝ մինչեւ որ արեւը տաքնայ։ Դռներուն փեղկերը ²ձեր ներկայութեա՛ն թող գոցեն ու նիգերը դնեն։ Երուսաղէմի բնակիչներէն պահապաններ թող ³նշանակեն, իւրաքանչիւրը իր պահակագունդին մէջ եւ իւրաքանչիւրը իր տան առջեւ»։

Քաղաքը ընդարձակ ու մեծ էր, բայց մէջի ժողովուրդը փոքրաթիւ էր, եւ տուները կառուցանուած չէին։

Իմ Աստուածս սիրտիս մէջ դրաւ որ ազնուականները, ատենակալներն ու ժողովուրդը հաւաքեմ, որպէսզի ազգահամարի մէջ արձանագրուին։ Առաջին անգամ գերութենէն Երուսաղէմ բարձրացողներուն ազգաբանութեան մէկ գիրքը գտայ, եւ անոր մէջ հետեւեա՛լը գրուած գտայ.

ՏԱՐԱԳՐՈՒԹԵՆԷՆ ՎԵՐԱԴԱՐՁՈՂՆԵՐՈՒՆ ՑԱՆԿԸ (Եզր. 2. 1-70)

«Ահա՛ւասիկ գաւառին ⁴բնակիչները՝ որոնք գերութենէն ⁵վերադարձան, այսինքն՝ տարագիրներուն որդիները — Բաբելոնի Նաբուգոդոնոսոր թագաւորը զանոնք Բաբելոն փոխադրած էր — որոնք Երուսաղէմ ու Հրէաստան վերադարձան, իւրաքանչիւրը՝ իր քաղաքը։

Անոնք Զօրաբաբէլի, Յեսուի, Նէեմիայի, Ազարիայի, Ռաամիայի, Նաեմանիի, Մուրթքէի, Բաղասանի, Մասփարաթի, Բագուէի, Նաւումի ու Բաանայի հետ եկան։ Ահա՛ւասիկ Իսրայէլի ժողովուրդին մարդոց թիւը.—

Փարոսի որդիները՝ երկու հազար հարիւր եօթանասուներկու հոգի էին,

Սափատիայի որդիները՝ երեք հարիւր եօթանասուներկու,

Արահի որդիները՝ վեց հարիւր յիսուներկու,

Փահաթ-Մովաբի որդիները՝ Յեսուի ու Յովաբի որդիներէն՝ երկու հազար ութ հարիւր տասնութ,

Եղամի որդիները՝ հազար երկու հարիւր յիսունչորս,

Զաթուի որդիները՝ ութ հարիւր քառասունհինգ,

Զաքքայի որդիները՝ եօթը հարիւր վաթսուն,

Բանուիի որդիները՝ վեց հարիւր քառասունութ,

Բեբայիի որդիները՝ վեց հարիւր քսանութ,

Ազգադի որդիները՝ երկու հազար երեք հարիւր քսաներկու,

Ադոնիկամի որդիները՝ վեց հարիւր վաթսունեօթը,

Բագուէի որդիները՝ երկու հազար վաթսունեօթը,

Ադինի որդիները՝ վեց հարիւր յիսունհինգ,

Ատերի որդիները՝ Եզեկիայէն՝ իննսունութ,

Հասումի որդիները՝ երեք հարիւր քսանութ,

Բեսէիի որդիները՝ երեք հարիւր քսանչորս,

Արիփի որդիները՝ հարիւր տասներկու,

Գաբաւոնի որդիները՝ իննսունհինգ,

Բեթլեհէմի ու Նետոփայի մարդիկը՝ հարիւր ութսունութ,

Անաթովթի մարդիկը՝ հարիւր քսանութ,

⁶Ազամօթի տան՝՝ մարդիկը՝ քառասուներկու,

Կարիաթարիմի, Կեփիրայի ու Բերովթի մարդիկը՝ եօթը հարիւր քառասուներեք,

Ռամայի ու Գաբայի մարդիկը՝ վեց հարիւր քսանմէկ,

Մաքմասի մարդիկը՝ հարիւր քսաներկու,

Բեթէլի ու Գայիի մարդիկը՝ հարիւր քսաներեք,

միւս Նաբաւի մարդիկը՝ յիսուներկու,

միւս Եղամի որդիները՝ հազար երկու հարիւր յիսունչորս,

Հարիմի որդիները՝ երեք հարիւր քսան,

Երիքովի որդիները՝ երեք հարիւր քառասունհինգ,

Ղովդի, Ադիդի եւ Ովնովի որդիները՝ եօթը հարիւր քսանմէկ,

Սենաայի որդիները՝ երեք հազար ինը հարիւր երեսուն։

«Քահանաները.— Յեսուի տունէն՝ Յեդայիայի որդիները՝ ինը հարիւր եօթանասուներեք հոգի էին,

Եմմերի որդիները՝ հազար յիսուներկու,

Փասուրի որդիները՝ հազար երկու հարիւր քառասունեօթը,

Հարիմի որդիները՝ հազար տասնեօթը։

«Ղեւտացիները.— Ովդուիայի որդիներէն՝ Յեսուի եւ Կադմիէլի որդիները՝ եօթանասունչորս հոգի էին։

«Երգողները.— Ասափի որդիները հարիւր քառասունութ հոգի էին։

«Դռնապանները.— Սեղղումի որդիները, Ատերի որդիները, Տեղմոնի որդիները, Ակկուբի որդիները, Ատիտայի որդիները, Սուբայի որդիները՝ հարիւր երեսունութ հոգի էին։

«⁷Նաթանայիմները.— Սիայի որդիները, Ասուփայի որդիները, Տաբաւոթի որդիները,

Կերոսի որդիները, Սիայի որդիները, Փադոնի որդիները,

Ղաբանայի որդիները, Ագաբայի որդիները, Սաղամէի որդիները,

Անանի որդիները, Գեդդէլի որդիները, Գահարի որդիները,

Ռէայիայի որդիները, Ռասինի որդիները, Նեկոդայի որդիները,

Գազամի որդիները, Ոզայի որդիները, Փասէի որդիները,

Բասիի որդիները, Մովանիմի որդիները, Նեփուսիմի որդիները,

Բակբոկի որդիները, Ակուփայի որդիները, Արուրի որդիները,

Բասաղոթի որդիները, Մէիդայի որդիները, Արսայի որդիները,

Բարկոսի որդիները, Սիսարայի որդիները, Թամայի որդիները,

Նեսիայի որդիները, Ատեփայի որդիները.

Սողոմոնին ծառաներուն որդիները, Սոտէի որդիները, Սոփերաթի որդիները, Փարեդայի որդիները,

Յեղայի որդիները, Դերկոնի որդիները, Գեդդէլի որդիները,

Սափատիայի որդիները, Ատտիլի որդիները, Փաքարաթ-Ասեբայիմի որդիները, Ամոնի որդիները.

բոլոր Նաթանայիմներն ու Սողոմոնի ծառաներուն որդիները երեք հարիւր իննսուներկու հոգի էին»։

Ահա՛ւասիկ Թեղմեղայէ, Թեղարսայէ, Քերուբէ, Ադդոնէ ու Եմմերէ ⁸վերադարձողները, որոնք իրենց ⁹նահապետութիւնը եւ իրենց զարմը չկրցան ապացուցանել, այսինքն՝ Իսրայէլէն ըլլալը.—

Դաղայիայի որդիները, Տուբիայի որդիներն ու Նեկոդայի որդիները՝ վեց հարիւր քառասուներկու հոգի.

նաեւ քահանաներէն՝ Աբայիայի որդիները, Ակկուսի որդիները, Բերզելիի որդիները, որ Գաղաադացի Բերզելիի աղջիկներէն կին առնելով՝ անոնց անունով կոչուեցաւ։

Ասոնք իրենց ազգահամարի արձանագրութիւնը փնտռեցին, բայց չգտնուեցաւ. ուստի քահանայութենէ արգիլուեցան՝ իբր ¹⁰անմաքուր,

եւ ¹¹Կառավարիչը անոնց ըսաւ. «Մինչեւ որ Ուրիմով ու Թումիմով քահանայ մը չելլէ, անոնք ամենասուրբ բաներէն թող չուտեն»։

Համախմբումը քառասուներկու հազար երեք հարիւր վաթսուն հոգի էր՝ բոլորը միասին,

բացի անոնց ծառաներէն եւ աղախիններէն, որոնք եօթը հազար երեք հարիւր երեսունեօթը հոգի էին. անոնց մէջ երկու հարիւր քառասունհինգ երգիչներ ու երգչուհիներ ալ կային։

Անոնց ձիերը՝ եօթը հարիւր երեսունվեց, ջորիները՝ երկու հարիւր քառասունհինգ,

ուղտերը՝ չորս հարիւր երեսունհինգ, եւ էշերը՝ վեց հազար եօթը հարիւր քսան հատ էին։

¹²Նահապետներէն ոմանք գործին համար ընծայ տուին։ Կառավարիչը հազար դրամ ոսկի, յիսուն կոնք ու հինգ հարիւր երեսուն քահանայական պատմուճան տուաւ գանձին։

Նահապետներէն ոմանք գործի գանձին քսան հազար դրամ ոսկի ու երկու հազար երկու հարիւր մնաս արծաթ տուին։

Մնացեալ ժողովուրդին տուածներն էին՝ քսան հազար դրամ ոսկի, երկու հազար մնաս արծաթ եւ վաթսունեօթը քահանայական պատմուճան։

Քահանաները, Ղեւտացիները, դռնապաններն ու երգողները, ժողովուրդէն եղողները, Նաթանայիմները եւ ամբողջ Իսրայէլը իրենց քաղաքներուն մէջ բնակեցան։ Երբ եօթներորդ ամիսը հասաւ, Իսրայէլի որդիները իրենց քաղաքներուն մէջ հաստատուած էին։