Nehemiah 12

Ezra  «  Nehemiah 11  ‹  Nehemiah 12  ›  Nehemiah 13  »  Esther

ՔԱՀԱՆԱՆԵՐՈՒՆ ԵՒ ՂԵՒՏԱՑԻՆԵՐՈՒՆ ՑԱՆԿԸ

Ահա՛ւասիկ Սաղաթիէլեան Զօրաբաբէլի ու Յեսուի հետ բարձրացող քահանաներն ու Ղեւտացիները.— Սարայիա, Երեմիա, Եզրաս,

Ամարիա, Մալուք, Քետտուս,

Սեքենիա, Հռէում, Մերամոթ,

Ադդով, Կանաթոն, Աբիա,

Միամին, Մովադիա, Բեղգա,

Սեմայիա, Յովարիբ, Յեդայիա,

Սալլու, Ամոկ, Քեղկիա, Յեդայիա։ Յեսուի օրերը, ասո՛նք էին քահանաներուն գլխաւորները՝ իրենց եղբայրներով։

Ղեւտացիները.— Յեսու, Բանուի, Կադմիէլ, Սարաբիա, Յուդա, ու Մաթանիա՝ որ ¹երգչախումբին վրայ նշանակուած էր, ինք եւ իր եղբայրները։

Անոնց եղբայրները՝ Բակբոկիա եւ Ուննի՝ անոնց դիմաց իրենց պաշտօնին վրայ էին։

ՅԵՍՈՒ ՔԱՀԱՆԱՅԱՊԵՏԻՆ ԶԱՐՄԸ

Յեսու ծնաւ Յովակիմը, Յովակիմ ծնաւ Եղիասիբը, Եղիասիբ ծնաւ Յովիադան,

Յովիադա ծնաւ Յովնաթանը, ու Յովնաթան ծնաւ Յադդուան։

ՔԱՀԱՆԱՅԱԿԱՆ ԴԱՍԻՆ ԳԼԽԱՒՈՐՆԵՐԸ

Յովակիմի օրերը՝ հետեւեալներն էին նահապետ քահանաները.— Սարայիայէն՝ Մարայիա, Երեմիայէն՝ Անանիա,

Եզրասէն՝ Մեսուղամ, Ամարիայէն՝ Յոհանան,

Մալուքէն՝ Յովնաթան, Սաբանիայէն՝ Յովսէփ,

Հարիմէն՝ Եդնա, Մարիոթէն՝ Քեղկայ,

Ադդովէն՝ Զաքարիա, Կանաթոնէն՝ Մեսուղամ,

Աբիայէն՝ Զեքրի, Մինիամինէն, Մովադիայէն՝ Փաղտի,

Բեղգայէն՝ Սամուա, Սեմայիայէն՝ Յովնաթան,

Յովարիբէն՝ Մաթանայ, Յեդայիայէն՝ Ոզի,

Սալլուէն՝ Կալլայ, Ամոկէն՝ Եբեր,

Քեղկիայէն՝ Ասաբիա, Յեդայիայէն՝ Նաթանայէլ։

ՔԱՀԱՆԱՅԱԿԱՆ ԵՒ ՂԵՒՏԱԿԱՆ ԸՆՏԱՆԻՔՆԵՐՈՒ ԱՐՁԱՆԱԳՐՈՒԹԻՒՆԸ

Եղիասիբի, Յովիադայի, Յոհանանի ու Յադդուայի օրերը՝ Ղեւտացիները, այսինքն՝ անոնց նահապետները, արձանագրուեցան, նաեւ քահանաները, մինչեւ պարսիկ Դարեհի թագաւորութիւնը։

Ղեւիի որդիներուն նահապետները Ժամանակագրութեան գիրքին մէջ արձանագրուեցան՝ մինչեւ Եղիասիբեան Յոհանանի օրերը։

ՏԱՃԱՐԻՆ ԾԱՌԱՅՈՒԹԵԱՆ ՍԱՀՄԱՆՈՒՄԸ

Ղեւտացիներուն գլխաւորներն էին՝ Ասաբիա, Սարաբիա, եւ Կադմիէլի որդին՝ Յեսու։ Անոնց եղբայրները իրենց դիմաց կը կայնէին, որպէսզի Աստուծոյ մարդուն՝ Դաւիթի պատուէրին համաձայն գովաբանեն ու շնորհակալ ըլլան, իրարու քով պաշտօն կատարելով։

Մաթանիա, Բակբոկիա, Աբդիա, Մեսուղամ, Տեղմոն եւ Ակկուբ՝ դռներու շտեմարաններուն մէջ պահապան եղող դռնապաններն էին։

Ասոնք պաշտօնի վրայ էին Յովսեդեկեան Յեսուի որդիին՝ Յովակիմի օրերը, ու Նէեմիա կուսակալին եւ Եզրաս քահանային ու դպիրին օրերը։

ՆԷԵՄԻԱ ԿԸ ՆՈՒԻՐԱԳՈՐԾԷ ՔԱՂԱՔԻՆ ՊԱՐԻՍՊԸ

Երուսաղէմի պարիսպին նաւակատիքին ատենը՝ Ղեւտացիները փնտռեցին իրենց բոլոր տեղերուն մէջ, որպէսզի զանոնք Երուսաղէմ բերեն եւ նաւակատիքը կատարեն ուրախութեամբ, շնորհակալական երգերով, ծնծղաներով, տաւիղներով ու քնարներով։

Երգողներուն որդիները հաւաքուեցան Երուսաղէմի շրջակայ դաշտէն, Նետոփաթացիներու գիւղերէն,

²Գաղգաղայի տունէն՝՝ ու Գաբայի եւ Ազամօթի դաշտերէն. արդարեւ երգողները Երուսաղէմի շուրջ գիւղեր կառուցաներ էին իրենց համար։

Քահանաներն ու Ղեւտացիները մաքրուեցան, եւ ժողովուրդը, դռներն ու պարիսպը մաքրեցին։

Յուդայի իշխանաւորները պարիսպին վրայ բարձրացուցի, ու երկու մեծ ³երգչախումբ ⁴նշանակեցի։ Մէկը պարիսպին վրայ՝ աջ կողմը քալեց, դէպի Աղբի դուռը.

անոր ետեւէն գացին Ովսէիա ու Յուդայի իշխանաւորներուն կէսը,

նաեւ Ազարիա, Եզրաս, Մեսուղամ, Յուդա,

Բենիամին, Սեմայիա ու Երեմիա,

եւ փողերով՝ քահանաներու որդիներէն՝ Ասափի որդիին՝ Զաքուրի որդիին՝ Միքիայի որդիին՝ Մաթանիայի որդիին՝ Սեմայիայի որդիին՝ Յովնաթանի որդին՝ Զաքարիա,

եւ անոր եղբայրները՝ Սեմայիա, Ազարիէլ, Միլալայ, Գիլալայ, Մաայ, Նաթանայէլ, Յուդա ու Անանի, Աստուծոյ մարդուն՝ Դաւիթի նուագարաններով. անոնց առջեւէն Եզրաս դպիրը կ’երթար։

Աղբիւրի դուռը հասնելով, իրենց առջեւ եղող Դաւիթի քաղաքին աստիճաններէն բարձրացան՝ պարիսպին զառիվերէն, Դաւիթի տունէն վեր դէպի արեւելք՝ մինչեւ Ջուրի դուռը։

Միւս երգչախումբը ⁵հակառակ կողմը՝՝ գնաց պարիսպին վրայ, ու ես՝ անոր ետեւէն, նաեւ ժողովուրդին կէսը, Փուռերու աշտարակէն մինչեւ Լայն պարիսպը,

եւ Եփրեմի դրան վրայէն, Հին դրան վրայէն, Ձուկերու դրան վրայէն, Անանայէլի աշտարակէն ու Մէայի աշտարակէն մինչեւ Ոչխարներու դուռը, եւ Բանտի դուռը կանգ առին։

Երկու երգչախումբերն ալ Աստուծոյ տան մէջ կայնեցան, նաեւ ես եւ ատենակալներուն կէսը՝ որոնք ինծի հետ էին,

ու քահանաները՝ Եղիակիմ, Մաասիա, Մինիամին, Միքիա, Եղիովենայի, Զաքարիա եւ Անանիա՝ փողերով,

ու Մաասիա, Սեմայիա, Եղիազար, Ոզի, Յոհանան, Մեղքիա, Եղամ ու Եզեր։ Այն ատեն երգողները իրենց վերատեսուչին՝ Յեզերիայի հետ իրենց ձայնը լսել տուին։

Այդ օրը մեծ զոհեր մատուցանեցին եւ ուրախացան, որովհետեւ Աստուած ⁶մեծապէս ուրախացուց զանոնք։ Կիներն ու զաւակներն ալ ուրախացան, եւ Երուսաղէմի ուրախութիւնը հեռաւոր տեղերէն ալ լսուեցաւ։

ՊԱՇՏԱՄՈՒՆՔԻ ՊԱՏՐԱՍՏՈՒԹԻՒՆ ՏԱՃԱՐԻՆ ՄԷՋ

Այդ օրը մարդիկ նշանակուեցան այն սենեակներուն վրայ, որոնք բարձրացնելիք ընծաներուն, ⁷երախայրիքին ու տասանորդներուն յատկացուած էին իբր շտեմարան, որպէսզի անոնց մէջ դիզեն քաղաքներուն արտերէն բերուած քահանաներուն եւ Ղեւտացիներուն օրինաւոր բաժինները։ Արդարեւ Յուդա ⁸պաշտօն կատարող՝՝ քահանաներուն եւ Ղեւտացիներուն համար ուրախացաւ,

որովհետեւ անոնք՝ երգողներուն ու դռնապաններուն հետ՝ իրենց Աստուծոյն պաշտօնը եւ մաքրութեան պաշտօնը կը կատարէին, Դաւիթի ու անոր որդիին՝ Սողոմոնի պատուէրին համաձայն։

Արդարեւ վաղուց՝ Դաւիթի եւ Ասափի օրերը՝ երգողներու գլխաւորներ կային, նաեւ Աստուծոյ գովաբանութեան ու շնորհակալութեան երգեր։

Զօրաբաբէլի օրերը եւ Նէեմիայի օրերը՝ ամբողջ Իսրայէլը երգողներուն ու դռնապաններուն բաժինները կու տար, ամէն օր՝ իր ⁹բաժինը. սուրբ բաները Ղեւտացիներուն կը ¹⁰վերապահէին, Ղեւտացիներն ալ Ահարոնի որդիներուն կը վերապահէին։