Nehemiah 13

Ezra  «  Nehemiah 12  ‹  Nehemiah 13  ›  Esther 1  »  Esther

ՕՏԱՐՆԵՐԷՆ ԶԱՏՈՒԻԼ

Այդ օրը Մովսէսի գիրքէն կարդացուեցաւ ժողովուրդին ¹առջեւ, եւ հոն գրուած գտնուեցաւ թէ Ամմոնացիներն ու Մովաբացիները Աստուծոյ համախմբումին մէջ յաւիտեան մտնելու չեն,

որովհետեւ անոնք Իսրայէլի որդիները հացով եւ ջուրով չդիմաւորեցին, հապա Բաղաամը անոնց դէմ վարձեցին, որպէսզի զանոնք անիծէ. բայց մեր Աստուածը անէծքը օրհնութեան փոխեց։

Երբ Օրէնքին խօսքերը լսեցին, բոլոր խառնածինները Իսրայէլէն զատեցին։

ՆԷԵՄԻԱՅԻ ԲԱՐԵԿԱՐԳՈՒԹԻՒՆՆԵՐԸ

Բայց ասկէ առաջ, մեր Աստուծոյն տան ²սենեակներուն վերատեսուչը՝ Եղիասիբ քահանան, Տուբիայի մերձաւորը,

անոր մեծ սենեակ մը պատրաստեր էր՝ ուր առաջ կը դնէին հացի ընծաները, կնդրուկը եւ անօթները, ցորենին, քաղցուին ու իւղին տասանորդները, նաեւ Ղեւտացիներուն, երգողներուն եւ դռնապաններուն համար որոշուածը, ու քահանաներուն տրուած բարձրացնելիք ընծաները։

Այդ ամբողջ ատենը ես Երուսաղէմ չէի, որովհետեւ Բաբելոնի Արտաշէս թագաւորին երեսուներկրորդ տարին թագաւորին գացեր էի։ Ժամանակէ մը ետք՝ թագաւորէն ³արտօնութիւն առի՝՝,

ու Երուսաղէմ գալով Եղիասիբի ըրած չարիքը հասկցայ, որ Աստուծոյ տան գաւիթին մէջ Տուբիայի համար մթերանոց մը պատրաստեր էր։

Շատ դժգոհեցայ, եւ Տուբիայի տան բոլոր առարկաները սենեակէն դուրս նետեցի։

Յետոյ հրամայեցի որ սենեակները մաքրեն, եւ Աստուծոյ տան անօթները, հացի ընծան ու կնդրուկը հոն վերադարձուցի։

Նաեւ տեղեկացայ թէ Ղեւտացիներուն բաժինները տրուած չէին, քանի ⁴պաշտօնը կատարող Ղեւտացիներէն ու երգողներէն իւրաքանչիւրը իր արտը փախած էր։

Ուստի ⁵ատենակալները յանդիմանեցի՝՝ եւ ըսի. «Ինչո՞ւ Աստուծոյ տունը այսպէս լքուած է». ապա ⁶զանոնք հաւաքեցի, ու զանոնք իրենց պաշտօնին մէջ ⁷հաստատեցի։

Այն ատեն ամբողջ Յուդան ցորենին, քաղցուին եւ իւղին տասանորդը շտեմարանները տարաւ։

Շտեմարաններուն վրայ Սեղեմիա քահանան, Սադովկ դպիրը, ու Ղեւտացիներէն՝ Փադայիան կարգեցի,— Մաթանիայի որդիին՝ Զաքուրի որդին՝ Անան ալ անոնց քով էր,— որովհետեւ անոնք հաւատարիմ կը սեպուէին. անոնց գործը իրենց եղբայրներուն բաժին տալ էր։

Ո՛վ իմ Աստուածս, յիշէ՛ զիս ասոր համար, ու մի՛ ջնջեր իմ ⁸բարեգործութիւններս, որ իմ Աստուծոյս տան մէջ եւ անոր ⁹պաշտօնին մէջ կատարեցի։

Այդ օրերը Հրէաստանի մէջ տեսայ ոմանք՝ որ Շաբաթ օրը հնձանին մէջ խաղող կը կոխէին, ցորենի որաներ կը մտցնէին, էշերու վրայ կը բեռցնէին, նաեւ գինի, խաղող, թուզ եւ ամէն տեսակ բեռ, ու զանոնք Շաբաթ օրը Երուսաղէմ կը բերէին. անոնց դէմ ¹⁰բողոքեցի՝ այն օրը երբ իրենց ուտեստեղէնը կը ծախէին։

Հոն Տիւրացիներ ալ կը բնակէին. ձուկ եւ ամէն տեսակ ¹¹ապրանք կը բերէին, ու Շաբաթ օրը Յուդայի որդիներուն եւ Երուսաղէմի մէջ կը ծախէին։

Յուդայի ազնուականները յանդիմանեցի ու անոնց ըսի. «Այս ի՞նչ չար արարք է որ դուք կը գործէք՝ Շաբաթ օրը պղծելով։

Ձեր հայրերն ալ այսպէս չըրի՞ն. ուստի մեր Աստուածը այս ամբողջ չարիքը բերաւ մեր վրայ եւ այս քաղաքին վրայ, ու դուք Շաբաթը պղծելով՝ աւելի բորբոքում կը բերէք Իսրայէլի վրայ»։

Ուստի հրամայեցի որ Երուսաղէմի դռները Շաբաթէն առաջ գոցուին՝ երբ դռները սկսին շուքի մէջ ըլլալ. նաեւ հրամայեցի որ անոնք չբացուին՝ մինչեւ որ Շաբաթը անցնի։ Իմ սպասաւորներէս ոմանք դռներուն քով ¹²տեղաւորեցի, որպէսզի ո՛չ մէկ բեռ Շաբաթ օրը ներս մտնէ։

Վաճառականները եւ ամէն տեսակ ¹³ապրանք ծախողները մէկ կամ երկու անգամ Երուսաղէմէն դուրս գիշերեցին։

Ես զանոնք յանդիմանեցի՝ ըսելով. «Դուք ինչո՞ւ պարիսպին քով կը գիշերէք. եթէ կրկին այդպէս ընէք, ձեզ պիտի ձերբակալեմ»։ Այդ ատենէն ի վեր անգամ մըն ալ Շաբաթ օրը չեկան։

Ղեւտացիներուն ալ հրամայեցի որ մաքրուին, ու Շաբաթ օրը սրբացնելու համար գան դռները պահպանեն։ Ո՛վ իմ Աստուածս, յիշէ՛ զիս ասոր համար ալ, եւ խղճա՛ իմ վրաս՝ քու մեծ կարեկցութեանդ համաձայն։

Այդ օրերը Հրեաներ տեսայ, որոնք ազովտացի, ամմոնացի ու մովաբացի ¹⁴կիներու հետ ամուսնացած՝՝ էին։

Անոնց որդիներուն կէսը ազովտերէն կը խօսէր. ¹⁵եբրայերէն խօսիլ չէին գիտեր, հապա մէկ կամ միւս ժողովուրդին լեզուն կը խօսէին։

Հետեւաբար զանոնք յանդիմանեցի, զանոնք անիծեցի, անոնցմէ ոմանք ալ ծեծեցի եւ իրենց մազերը փետեցի։ Ապա Աստուծոյ անունով անոնց երդում ընել տուի՝ ըսելով. «Ձեր աղջիկները անոնց որդիներուն պիտի չտաք, ու անոնց աղջիկներէն ձեր որդիներուն կամ ձեզի պիտի չառնէք իբր կին։

Ասով չէ՞ր՝ որ Իսրայէլի Սողոմոն թագաւորը մեղանչեց. թէպէտ շատ ազգերու մէջ անոր պէս թագաւոր չկար, իր Աստուծոյն սիրելի էր, եւ Աստուած զինք ամբողջ Իսրայէլի վրայ թագաւոր կարգեր էր, օտարազգի կիները անո՛ր ալ մեղանչել տուին։

Ուստի հիմա ¹⁶ձեզ թողո՞ւնք՝՝ որ այս ամբողջ մեծ չարիքը գործէք, եւ օտարազգի կիներու հետ ամուսնանալով՝ մեր Աստուծոյն հանդէպ ուխտազանց ըլլաք»։

Եղիասիբ քահանայապետին որդիին՝ Յովիադայի որդիներէն մէկը Որոնացի Սանաբաղատի փեսան էր. հետեւաբար զայն քովէս ¹⁷վռնտեցի։

Ո՛վ իմ Աստուածս, յիշէ՛ զանոնք, քանի որ պղծեցին քահանայութիւնը եւ ¹⁸քահանաներուն ու Ղեւտացիներուն ուխտը։

Այսպէս՝ զանոնք բոլոր օտարազգիներէն մաքրեցի, եւ քահանաներուն ու Ղեւտացիներուն պաշտօնները ¹⁹վերահաստատեցի, անոնցմէ իւրաքանչիւրը իր գործին վրայ նշանակելով։

Նաեւ որոշուած ատենները կատարուելիք փայտի մատուցումն ու երախայրիքը վերահաստատեցի։ Ո՛վ իմ Աստուածս, յիշէ՛ զիս բարիքի համար։