Numbers 4

Leviticus  «  Numbers 3  ‹  Numbers 4  ›  Numbers 5  »  Deuteronomy

ՂԵՒԻԻ ՈՐԴԻՆԵՐԷՆ ԿԱՀԱԹԻ ՊԱՐՏԱԿԱՆՈՒԹԻՒՆՆԵՐԸ

Տէրը խօսեցաւ Մովսէսի ու Ահարոնի՝ ըսելով.

«Ղեւիի որդիներուն մէջէն՝ Կահաթի որդիներուն գումա՛րը առ, իրենց գերդաստաններուն եւ նահապետութիւններուն համեմատ։

Թուարկէ՛ երեսուն տարեկանէն վեր մինչեւ յիսուն տարեկան բոլոր անոնք, որ սպասարկութեան մէջ կը մտնեն՝ Հանդիպումի վրանին մէջ գործ կատարելու համար։

Հանդիպումի վրանին մէջ Կահաթի որդիներուն պաշտօնը՝ ամենասուրբ բաները պիտի ըլլան։

Երբ բանակը մեկնի, Ահարոն ու անոր որդիները թող գան, ծածկող վարագոյրը իջեցնեն եւ անով Վկայութեան տապանակը ծածկեն։

Իշղարի մորթերէ ծածքը անոր վրայ թող դնեն, ամբողջովին ¹կապուտակէ լաթ մը տարածեն անոր վրայ, ու անոր ձողերը անցընեն։

Առաջադրութեան հացի սեղանին վրայ կապուտակէ լաթ մը թող տարածեն, եւ անոր վրայ դնեն ափսէները, խնկամանները, թասերն ու ²թափելիք նուէր ընծայելու՝՝ բաժակները. մշտատեւ հացն ալ անոր վրայ պիտի ըլլայ։

Անոնց վրայ ³կրկնակի կարմիրէ՝՝ լաթ մը թող տարածեն, իշղարի մորթերէ ծածքով ծածկեն զայն եւ անոր ձողերը անցընեն։

Կապուտակէ լաթ մը թող առնեն ու ծածկեն լուսակալին աշտանակը, անոր ճրագները, ունելիները, ճրագաբերանները եւ անոր բոլոր իւղի անօթները, որոնցմով անոր պաշտօնը կը կատարեն։

Զայն իր բոլոր առարկաներով թող դնեն իշղարի մորթերէ ծածքի մը մէջ, ու ձողի մը վրայ դնեն զայն։

Ոսկի զոհասեղանին վրայ կապուտակէ լաթ մը թող տարածեն, իշղարի մորթերէ ծածքով մը ծածկեն զայն եւ անոր ձողերը անցընեն։

Պաշտօնին բոլոր առարկաները՝ որոնցմով պաշտօն կը կատարեն սրբարանին մէջ՝ թող առնեն, կապուտակէ լաթի մը մէջ փաթթեն, իշղարի մորթերէ ծածքով ծածկեն զանոնք, ու ձողի մը վրայ դնեն։

Ողջակէզի զոհասեղանէն մոխիրները հանելով՝ անոր վրայ ⁴ծիրանիէ լաթ մը թող տարածեն,

անոր վրայ թող դնեն անոր բոլոր առարկաները՝ որոնք անոր պաշտօնին համար կը գործածուին, այսինքն՝ կրակարանները, մսահանները, թիակներն ու կոնքերը (զոհասեղանին բոլոր առարկաները), անոր վրայ իշղարի մորթերէ ծածք մը թող տարածեն եւ անոր ձողերը անցընեն։

Բանակին մեկնած ատենը՝ երբ Ահարոն ու անոր որդիները աւարտեն սրբարանը եւ սրբարանին բոլոր առարկաները ծածկելը, յետոյ Կահաթի որդիները թող գան զանոնք կրելու. բայց սուրբ բաներու թող չդպչին, որպէսզի չմեռնին»։ Ասո՛նք են Կահաթի որդիներուն կրելիք բեռները՝ Հանդիպումի վրանէն։

Ահարոն քահանային որդին՝ Եղիազար վերատեսուչ թող ըլլայ լուսակալին իւղին, անուշաբոյր խունկին, մշտատեւ հացի ընծային եւ օծումի իւղին վրայ. ամբողջ խորանին, անոր մէջի բոլոր բաներուն, սրբարանին ու անոր առարկաներուն վրայ վերատեսուչ ըլլայ»։

Տէրը խօսեցաւ Մովսէսի եւ Ահարոնի՝ ըսելով.

«Մի՛ թողուք որ Ղեւտացիներուն մէջէն Կահաթեաններու գերդաստաններուն տոհմը բնաջնջուի.

հապա սա՛ ըրէք անոնց, որպէսզի երբ ամենասուրբ բաներուն մօտենան՝ ողջ մնան ու չմեռնին։ Ահարոն ու իր որդիները թող գան եւ անոնցմէ իւրաքանչիւրին պաշտօնն ու բեռը որոշեն։

Բայց երբ սուրբ բաները կը ծածկուին, անոնք տեսնելու համար թող ներս չմտնեն, որպէսզի չմեռնին»։

ՂԵՒԻԻ ՈՐԴԻՆԵՐԷՆ ԳԵՐՍՈՆԻ ՊԱՐՏԱԿԱՆՈՒԹԻՒՆՆԵՐԸ

Տէրը խօսեցաւ Մովսէսի՝ ըսելով.

«Գերսոնի որդիներուն գումա՛րն ալ առ, իրենց նահապետութիւններուն եւ գերդաստաններուն համեմատ։

Թուարկէ՛ երեսուն տարեկանէն վեր մինչեւ յիսուն տարեկան բոլոր անոնք, որ սպասարկութեան մէջ կը մտնեն՝ Հանդիպումի վրանին մէջ ծառայութիւն ընելու համար։

Ահա՛ւասիկ Գերսոնեաններու գերդաստաններուն ծառայելու եւ բեռ կրելու պաշտօնը.—

Անո՛նք պիտի կրեն խորանին վարագոյրներն ու Հանդիպումի վրանը, անոր ծածքը եւ անոր վրայի իշղարի ծածքը, Հանդիպումի վրանին մուտքի վարագոյրը,

խորանին ու զոհասեղանին շրջակայ սրահին վարագոյրները եւ սրահի դրան մուտքի վարագոյրը, անոնց չուաններն ու ծառայութեան բոլոր առարկաները, ամէն ինչ որ շինուած է անոնց համար. ա՛յսպէս պիտի ծառայեն։

Գերսոնեաններու որդիներուն ամբողջ պաշտօնը, իրենց բոլոր բեռներուն եւ ամբողջ ծառայութեան համար, Ահարոնի ու անոր որդիներուն հրամանով պիտի ըլլայ։ Անոնց բոլոր բեռները իրենց վերատեսչութեա՛ն յանձնեցէք իբր ⁵պաշտօն։

Ա՛յս է Գերսոնեաններու որդիներուն գերդաստաններուն ծառայութիւնը Հանդիպումի վրանին մէջ. անոնց ⁶պաշտօնը Ահարոն քահանային որդիին՝ Իթամարի ձեռքին տակ պիտի ըլլայ»։

ՂԵՒԻԻ ՈՐԴԻՆԵՐԷՆ ՄԵՐԱՐԻԻ ՊԱՐՏԱԿԱՆՈՒԹԻՒՆՆԵՐԸ

«Թուարկէ՛ նաեւ Մերարիի որդիները, իրենց գերդաստաններուն եւ նահապետութիւններուն համեմատ.

Թուարկէ՛ երեսուն տարեկանէն վեր մինչեւ յիսուն տարեկան բոլոր անոնք, որ սպասարկութեան մէջ կը մտնեն՝ Հանդիպումի վրանին ծառայութիւնը ընելու համար։

Ահա՛ւասիկ իրենց բեռներուն ⁷պաշտօնը՝ Հանդիպումի վրանին մէջ իրենց ամբողջ ծառայութեան համեմատ.— խորանին տախտակներն ու անոր նիգերը, սիւները եւ խարիսխները,

շրջակայ սրահին սիւները, անոնց խարիսխները, ցիցերն ու չուանները՝ անոնց բոլոր առարկաներով, իրենց ամբողջ ծառայութեան համեմատ. անոնց բեռներուն ⁸պաշտօնին առարկաները անուններո՛վ նշանակեցէք։

Ա՛յս է Մերարիի որդիներուն գերդաստաններուն պաշտօնը Հանդիպումի վրանին մէջ, իրենց ամբողջ ծառայութեան համեմատ, Ահարոն քահանային որդիին՝ Իթամարի ձեռքին տակ»։

ՂԵՒՏԱՑԻՆԵՐՈՒՆ ՄԱՐԴԱՀԱՄԱՐԸ

Մովսէս, Ահարոն ու համայնքին իշխանները թուարկեցին Կահաթեաններու որդիները՝ անոնց գերդաստաններուն եւ նահապետութիւններուն համեմատ,

երեսուն տարեկանէն վեր մինչեւ յիսուն տարեկան բոլոր անոնք, որ սպասարկութեան մէջ մտան՝ Հանդիպումի վրանին մէջ ծառայելու համար.

անոնցմէ թուարկուածները՝ իրենց գերդաստաններով՝ երկու հազար եօթը հարիւր յիսուն հոգի էին։

Ասոնք են Կահաթեաններու գերդաստաններէն թուարկուածները, Հանդիպումի վրանին մէջ բոլոր ծառայողները, որ Մովսէս ու Ահարոն թուարկեցին, ինչպէս Տէրը Մովսէսի ⁹միջոցով հրամայեր էր։

Գերսոնի որդիներէն թուարկուածները՝ իրենց գերդաստաններուն եւ նահապետութիւններուն համեմատ,

երեսուն տարեկանէն վեր մինչեւ յիսուն տարեկան բոլոր անոնք, որ սպասարկութեան մէջ մտան՝ Հանդիպումի վրանին մէջ ծառայելու համար,

այսինքն անոնցմէ թուարկուածները՝ իրենց գերդաստաններուն եւ նահապետութիւններուն համեմատ՝ երկու հազար վեց հարիւր երեսուն հոգի էին։

Ասոնք են Գերսոնի որդիներուն գերդաստաններէն թուարկուածները, Հանդիպումի վրանին մէջ բոլոր ծառայութիւն ընողները, որ Մովսէս ու Ահարոն թուարկեցին Տէրոջ հրամանին համաձայն։

Մերարիի որդիներուն գերդաստաններէն թուարկուածները՝ իրենց գերդաստաններուն եւ նահապետութիւններուն համեմատ,

երեսուն տարեկանէն վեր մինչեւ յիսուն տարեկան բոլոր անոնք, որ սպասարկութեան մէջ մտան՝ Հանդիպումի վրանին մէջ ծառայելու համար,

այսինքն անոնցմէ թուարկուածները՝ իրենց գերդաստաններով՝ երեք հազար երկու հարիւր հոգի էին։

Ասոնք են Մերարիի որդիներուն գերդաստաններէն թուարկուածները, որ Մովսէս ու Ահարոն թուարկեցին Տէրոջ հրամանին համաձայն՝ Մովսէսի ¹⁰միջոցով տրուած։

Ղեւտացիներէն բոլոր թուարկուածները՝ որ Մովսէս, Ահարոն ու Իսրայէլի իշխանները թուարկեցին իրենց գերդաստաններուն եւ նահապետութիւններուն համեմատ,

երեսուն տարեկանէն վեր մինչեւ յիսուն տարեկան բոլոր անոնք՝ որ մտան Հանդիպումի վրանին մէջ պաշտօնի ծառայութիւնը ու բեռ կրելու ծառայութիւնը ընելու,

այսինքն անոնցմէ թուարկուածները՝ ութ հազար հինգ հարիւր ութսուն հոգի էին։

Անոնք Տէրոջ հրամանին համաձայն թուարկուեցան Մովսէսի ձեռքով, իւրաքանչիւրը իր պաշտօնին համեմատ եւ իր բեռին համեմատ. ա՛յսպէս թուարկուեցան անոնք, ինչպէս Տէրը Մովսէսի պատուիրեր էր։