Numbers 10

Leviticus  «  Numbers 9  ‹  Numbers 10  ›  Numbers 11  »  Deuteronomy

ԱՐԾԱԹԷ ՓՈՂԵՐԸ

Տէրը խօսեցաւ Մովսէսի՝ ըսելով.

«Քեզի արծաթէ երկո՛ւ փող շինէ. զանոնք կռածո՛յ շինէ, որպէսզի համայնքը կանչելու համար ու բանակներուն մեկնումին համար ¹գործածես։

Երբ զանոնք հնչեցնեն, ամբողջ համայնքը քովդ թող հաւաքուի՝ Հանդիպումի վրանին մուտքը։

Եթէ փողին մէկը հնչեցնեն, իշխանները, Իսրայէլի հազարապետները, քովդ թող հաւաքուին։

Երբ մեծագոչ հնչեցնէք, արեւելեան կողմը իջեւանող բանակները թող մեկնին։

Երբ երկրորդ անգամ մեծագոչ հնչեցնէք, հարաւային կողմը իջեւանող բանակները թող մեկնին։ Անոնց մեկնումին համար մեծագոչ թող հնչեցնեն։

Երբ համախմբումը ²հաւաքէք, փողը հնչեցուցէ՛ք, բայց մի՛ գոռացնէք։

Ահարոնի որդինե՛րը՝ քահանանե՛րը թող հնչեցնեն փողը, եւ ասիկա ձեզի յաւիտենական կանոն թող ըլլայ ձեր սերունդներուն մէջ։

Եթէ ձեր երկրին մէջ պատերազմելու երթաք ձեզ ճնշող հակառակորդին դէմ, գոռացուցէ՛ք փողերը, որպէսզի յիշուիք Տէրոջ՝ ձեր Աստուծոյն առջեւ, ու ձեր թշնամիներէն ազատիք։

Նաեւ ձեր ուրախութեան օրերը, ձեր ³հանդիսաւոր տօներուն՝՝ եւ ամսագլուխներուն՝ հնչեցուցէ՛ք փողերը ձեր ողջակէզներուն ու խաղաղութեան զոհերուն վրայ, որպէսզի ձեզի իբր յիշատակ ըլլան ձեր Աստուծոյն առջեւ։ Ե՛ս եմ Տէրը՝ ձեր Աստուածը»։

ԻՍՐԱՅԵԼԱՑԻՆԵՐԸ ԿԸ ՄԵԿՆԻՆ ԲԱՆԱԿԱՎԱՅՐԷՆ

Երկրորդ տարին, երկրորդ ամսուան քսաներորդ օրը, ամպը բարձրացաւ Վկայութեան խորանին վրայէն։

Ուստի Ւսրայէլի որդիները՝ իրենց մեկնումին կարգով՝ Սինայի անապատէն մեկնեցան, եւ ամպը Փառանի անապատին մէջ կեցաւ։

Առաջի՛ն անգամ կը մեկնէին՝ Մովսէսի ⁴միջոցով տրուած Տէրոջ հրամանին համաձայն։

Առաջ Յուդայի որդիներուն բանակին դրօշը մեկնեցաւ՝ իրենց զօրաբաժիններուն կարգով. Ամինադաբի որդին՝ Նաասոն անոր զօրաբաժինին վրայ էր,

Սովգարի որդին Նաթանայէլ՝ Իսաքարի որդիներուն տոհմին զօրաբաժինին վրայ,

ու Քեղոնի որդին Եղիաբ՝ Զաբուղոնի որդիներուն տոհմին զօրաբաժինին վրայ։

Խորանը քակեցին, եւ Գերսոնի որդիներն ու Մերարիի որդիները մեկնեցան՝ խորանը կրելով։

Ռուբէնի բանակին դրօշը մեկնեցաւ իր զօրաբաժիններուն կարգով. Սեդիուրի որդին՝ Եղիսուր անոր զօրքին վրայ էր,

Սուրիսադայի որդին Սաղամիէլ՝ Շմաւոնի որդիներուն տոհմին զօրաբաժինին վրայ,

եւ Դագուէլի որդին Եղիասափ՝ Գադի որդիներուն տոհմին զօրաբաժինին վրայ։

Յետոյ Կահաթեանները մեկնեցան՝ սրբարանը կրելով. խորանը կանգնեցուցին մինչեւ անոնց գալը։

Եփրեմի որդիներուն բանակին դրօշը մեկնեցաւ իրենց զօրաբաժիններուն կարգով. Ամիուդի որդին՝ Եղիսամա անոր զօրքին վրայ էր,

Փադսասուրի որդին Գամաղիէլ՝ Մանասէի որդիներուն տոհմին զօրաբաժինին վրայ,

ու Գեդէոնիի որդին Աբիդան՝ Բենիամինի որդիներուն տոհմին զօրաբաժինին վրայ։

Դանի որդիներուն բանակին դրօշը՝ իրենց զօրաբաժիններուն կարգով՝ բոլոր բանակներուն ⁵ետեւէն մեկնեցաւ՝՝. Ամիսադայի որդին՝ Աքիեզեր անոր զօրքին վրայ էր,

Եքրանի որդին Փագիէլ՝ Ասերի որդիներուն տոհմին զօրաբաժինին վրայ,

ու Ենանի որդին Աքիրէ՝ Նեփթաղիմի որդիներուն տոհմին զօրաբաժինին վրայ։

Ա՛յս էր Իսրայէլի որդիներուն մեկնումին կարգը՝ իրենց զօրաբաժիններուն համեմատ, երբ մեկնէին։

Մովսէս Յոբաբի ըսաւ, այսինքն իր աներոջ՝ Մադիանացի Ռագուէլի որդիին. «Մենք կը մեկնինք այն տեղը՝ որուն համար Տէրը ըսաւ. “Ձեզի՛ պիտի տամ զայն”։ Եկո՛ւր մեզի հետ. բարիք պիտի ընենք քեզի, որովհետեւ Տէրը Իսրայէլի ⁶բարիք խոստացաւ՝՝»։

Ան ալ իրեն ըսաւ. «Չեմ երթար, այլ իմ երկի՛րս եւ իմ ազգականներո՛ւս պիտի երթամ»։

Ինք ըսաւ. «Կ’աղերսե՛մ, մի՛ թողուր մեզ, քանի որ անապատին մէջ մեր բանակելու տեղերը գիտես. մեզի ⁷առաջնո՛րդ եղիր։

Եթէ մեզի հետ գաս, ի՛նչ բարիք որ Տէրը մեզի ընէ, մենք ալ քեզի նոյնը պիտի ընենք»։

ԺՈՂՈՎՈՒՐԴԸ ԿԸ ՃԱՄԲՈՐԴԷ

Անոնք Տէրոջ լեռնէն մեկնեցան՝ երեք օրուան ճամբորդութեան համար. Տէրոջ ուխտին տապանակը անոնց առջեւէն գնաց՝ երեք օրուան ճամբայ, անոնց հանգստավայր մը հետախուզելու համար։

Երբ բանակավայրէն կը մեկնէին, Տէրոջ ամպը ցերեկը անոնց վրայ էր։

Երբ տապանակը մեկնէր՝ Մովսէս կ’ըսէր. «Կանգնէ՛, ո՛վ Տէր, եւ քու թշնամիներդ թող ցրուին ու քեզ ատողները առջեւէդ փախչին»։

Իսկ երբ ան հանգչէր՝ ինք կ’ըսէր. «Վերադարձի՛ր, ո՛վ Տէր, Իսրայէլի հազարաւոր բիւրաւորներուն»։