Numbers 20

Leviticus  «  Numbers 19  ‹  Numbers 20  ›  Numbers 21  »  Deuteronomy

ԴԷՊՔԵՐ ԿԱԴԷՍԻ ՄԷՋ (Ելք. 17. 1-7)

Իսրայէլի որդիներուն ամբողջ համայնքը Սինի անապատը հասաւ առաջին ամիսը, եւ ժողովուրդը Կադէս կեցաւ։ Մարիամ հոն մեռաւ ու հոն թաղուեցաւ։

Համայնքին խմելու ջուր չկար, ուստի Մովսէսի դէմ եւ Ահարոնի դէմ համախմբուեցան։

Ժողովուրդը Մովսէսի հետ վիճեցաւ, ու խօսեցան՝ ըսելով. «Երանի՜ թէ մենք ալ մեր շունչը տուած ըլլայինք, երբ մեր եղբայրները իրենց շունչը տուին Տէրոջ առջեւ։

Ինչո՞ւ Տէրոջ համախմբումը այս անապատը բերիք, որ մենք եւ մեր անասունները հոս մեռնինք։

Ինչո՞ւ մեզ Եգիպտոսէն բարձրացուցիք՝ մեզ այս վատ տեղը բերելու համար։ Հոս ո՛չ սերմ ցանելու տեղ է, ո՛չ ալ՝ թզենիներու, որթատունկերու եւ նռնենիներու. խմելու ջուր անգամ չկայ»։

Մովսէս ու Ահարոն համախմբումին առջեւէն ելլելով Հանդիպումի վրանին մուտքը գացին եւ իրենց երեսին վրայ ինկան, ու Տէրոջ փառքը իրենց երեւցաւ։

Տէրը խօսեցաւ Մովսէսի՝ ըսելով.

«Ա՛ռ գաւազանը եւ համախմբէ՛ համայնքը, դուն ու քու եղբայրդ՝ Ահարոն, եւ անոնց աչքերուն առջեւ խօսեցէ՛ք ժայռին, ու իր ջուրը պիտի տայ։ Դուն ժայռէ՛ն ջուր պիտի հանես անոնց, եւ համայնքին ու անոնց անասուններուն խմցնես»։

Մովսէս Տէրոջ առջեւէն առաւ գաւազանը, ինչպէս իրեն պատուիրեց։

Մովսէս եւ Ահարոն համախմբումը ժայռին առջեւ ¹հաւաքեցին, ու անոնց ըսաւ. «Մտի՛կ ըրէք այժմ, ո՛վ անհնազանդներ. ձեզի այս ժայռէ՞ն ջուր հանենք»։

Ապա Մովսէս իր ձեռքը վերցուց, եւ իր գաւազանով երկու անգամ ժայռին զարկաւ։ Ջուրը առատօրէն դուրս ելաւ, ու համայնքը եւ անոր անասունները խմեցին։

Տէրը խօսեցաւ Մովսէսի ու Ահարոնի. «Որովհետեւ ինծի չհաւատացիք՝ Իսրայէլի որդիներուն աչքերուն առջեւ զիս ²փառաւորելու համար, այս համախմբումը դո՛ւք պիտի չտանիք այն երկիրը՝ որ անոնց տուի»։

Ա՛յս է ³Մերիպայի ջուրը. որովհետեւ Իսրայէլի որդիները Տէրոջ դէմ վիճեցան, եւ ինք սուրբ եղաւ անոնց մէջ։

ԵԴՈՎՄԻ ԹԱԳԱՒՈՐԸ Կ’ԱՐԳԻԼԷ ԻՍՐԱՅԷԼԻ ԱՆՑՔԸ

Մովսէս Կադէսէն պատգամաւորներ ղրկեց Եդովմի թագաւորին ու ըսաւ. «Սա՛ կ’ըսէ քու եղբայրդ՝ Իսրայէլ. “Մեզի պատահած ամբողջ տաժանքը գիտես.

ի՛նչպէս մեր հայրերը Եգիպտոս իջան ու երկար ժամանակ Եգիպտոսի մէջ բնակեցանք։ Եգիպտացիները չարչարեցին մեզ եւ մեր հայրերը,

ու երբ մենք Տէրոջ աղաղակեցինք՝ լսեց մեր ձայնը. հրեշտակ մը ղրկեց, մեզ Եգիպտոսէն հանեց, եւ ահա՛ մենք Կադէս ենք, քու հողամասիդ ծայրի քաղաքը։

Կ’աղերսե՛նք, թո՛ղ որ անցնինք քու երկրէդ. արտերէն ու այգիներէն պիտի չանցնինք եւ հորերէն ջուր պիտի չխմենք. թագաւորին ճամբայէն պիտի քալենք, աջ կողմ կամ ձախ կողմ պիտի չշեղինք՝ մինչեւ որ քու հողամասէդ անցնինք”»։

Բայց Եդովմ անոր ըսաւ. «⁴Իմ երկրէս՝՝ մի՛ անցնիր, որպէսզի սուրով դուրս չելլեմ քու դիմացդ»։

Իսրայէլի որդիները ըսին անոր. «Մենք պողոտայէ՛ն պիտի բարձրանանք. եթէ ես ու իմ խաշինքս քու ջուրէդ խմենք, անոր գինը պիտի վճարեմ. առանց ուրիշ բան մը ընելու՝ միայն ոտքերովս պիտի անցնիմ»։

Բայց ան ըսաւ. «Պիտի չանցնի՛ս». ու Եդովմ մեծ բազմութեամբ եւ ուժեղ ձեռքով դուրս ելաւ անոնց դիմաց։

Այսպէս՝ Եդովմ մերժեց իր հողամասէն Իսրայէլի ճամբայ տալ. ուստի Իսրայէլ շեղեցաւ անկէ։

ԱՀԱՐՈՆԻ ՄԱՀԸ

Կադէսէն մեկնեցան, ու Իսրայէլի որդիներուն ամբողջ համայնքը Հովր լեռը հասաւ։

Տէրը խօսեցաւ Մովսէսի եւ Ահարոնի՝ Հովր լեռը, Եդովմի երկրին սահմանին քով, ըսելով.

«Ահարոն իր ժողովուրդին մէջ պիտի ամփոփուի. արդարեւ պիտի չմտնէ այն երկիրը՝ որ Իսրայէլի որդիներուն տուի, քանի որ Մերիպայի ջուրին քով իմ հրամանիս դէմ ընդվզեցաք։

Ահարոնը եւ անոր որդին՝ Եղիազարը ա՛ռ, ու Հովր լե՛ռը բարձրացուր զանոնք։

Ահարոնը իր հագուստներէն մերկացո՛ւր, եւ անոր որդիին՝ Եղիազարի՛ հագցուր զանոնք. որովհետեւ Ահարոն իր ժողովուրդին մէջ պիտի ամփոփուի, ու հո՛ն մեռնի»։

Մովսէս Տէրոջ պատուիրածին համաձայն ըրաւ, եւ ամբողջ համայնքին աչքերուն առջեւ Հովր լեռը բարձրացան։

Մովսէս մերկացուց Ահարոնը իր հագուստներէն, ու անոր որդիին՝ Եղիազարի հագցուց զանոնք։ Ահարոն հոն մեռաւ, լերան գագաթը, իսկ Մովսէս ու Եղիազար լեռնէն իջան։

Երբ ամբողջ համայնքը տեսաւ թէ Ահարոն շունչը տուած է, Իսրայէլի ամբողջ տունը երեսուն օր լացաւ Ահարոնի համար։