Numbers 26

Leviticus  «  Numbers 25  ‹  Numbers 26  ›  Numbers 27  »  Deuteronomy

ԵՐԿՐՈՐԴ ՄԱՐԴԱՀԱՄԱՐԸ

Պատուհասէն ետք Տէրը խօսեցաւ Մովսէսի եւ Ահարոնի որդիին՝ Եղիազար քահանային, ըսելով.

«Առէ՛ք Իսրայէլի որդիներուն ամբողջ համայնքին գումարը՝ իրենց նահապետութիւններուն համեմատ, թուարկելով քսան տարեկանէն վեր եղողները, այսինքն Իսրայէլի մէջ բոլոր զինուորութեան ¹գացողները»։

Ուստի Մովսէս ու Եղիազար քահանան՝ Մովաբի դաշտերուն մէջ, Երիքովի դիմաց, Յորդանանի մօտ, անոնց հետ խօսեցան՝ ըսելով.

«Քսան տարեկանէն վեր եղողները պիտի թուարկենք, ինչպէս Տէրը Մովսէսի պատուիրեց»։ Ահա՛ւասիկ Եգիպտոսի երկրէն ելած Իսրայէլի որդիները.—

Ռուբէն՝ Իսրայէլի անդրանիկը, եւ Ռուբէնի որդիները. Ենովքէ՝ Ենովքեաններուն գերդաստանը, Փաղղուսէ՝ Փաղղուսեաններուն գերդաստանը,

Եսրոնէ՝ Եսրոնեաններուն գերդաստանը, Քարմիէ՝ Քարմեաններուն գերդաստանը յառաջ եկաւ։

Ռուբէնեաններուն գերդաստանները ասոնք են. անոնց թուարկուածները քառասուներեք հազար եօթը հարիւր երեսուն հոգի էին։

Փաղղուսի որդին Եղիաբ էր,

ու Եղիաբի որդիները՝ Նամուէլ, Դաթան եւ Աբիրոն էին։ Այս Դաթանն ու Աբիրոնը համայնքին մէջ անուանիներ էին. ասոնք էին որ Տէրոջ դէմ ըմբոստացող Կորխի խումբին հետ՝ Մովսէսի դէմ եւ Ահարոնի դէմ ըմբոստացան,

ու երկիրը իր բերանը բանալով կլլեց զանոնք եւ Կորխն ալ, երբ այդ խումբը մեռաւ. կրակը այդ երկու հարիւր յիսուն մարդիկը սպառեց, ու անոնք բոլորին օրինակ եղան։

Բայց Կորխի որդիները չմեռան։

Շմաւոնի որդիները՝ իրենց գերդաստաններով. ²Նամուէլէ՝ Նամուէլեաններուն՝՝ գերդաստանը, Յամինէ՝ Յամինեաններուն գերդաստանը, Յաքինէ՝ Յաքինեաններուն գերդաստանը,

Զարայէ՝ Զարայեաններուն գերդաստանը, Սաւուղէ՝ Սաւուղեաններուն գերդաստանը յառաջ եկաւ։

Շմաւոնեաններուն գերդաստանները ասոնք են — քսաներկու հազար երկու հարիւր հոգի։

Գադի որդիները՝ իրենց գերդաստաններով. Սափոնէ՝ Սափոնեաններուն գերդաստանը, Անգիէ՝ Անգեաններուն գերդաստանը, Սունիէ՝ Սունեաններուն գերդաստանը,

Ազենիէ՝ Ազենեաններուն գերդաստանը, Էրիէ՝ Էրեաններուն գերդաստանը,

Արոդիէ՝ Արոդեաններուն գերդաստանը, Արելիէ՝ Արելեաններուն գերդաստանը յառաջ եկաւ։

Գադի որդիներուն գերդաստանները ասոնք են. անոնց թուարկուածները քառասուն հազար հինգ հարիւր հոգի էին։

Յուդայի որդիները՝ Էր եւ Օնան էին. բայց Էր ու Օնան Քանանի երկրին մէջ մեռան։

Ահա՛ւասիկ Յուդայի որդիները՝ իրենց գերդաստաններով. Սելոմէ՝ Սելոմեաններուն գերդաստանը, Փարէսէ՝ Փարէսեաններուն գերդաստանը, Զարայէ՝ Զարայեաններուն գերդաստանը յառաջ եկաւ։

Ահա՛ւասիկ Փարէսի որդիները. Եսրոնէ՝ Եսրոնեաններուն գերդաստանը, Համուլէ՝ Համուլեաններուն գերդաստանը յառաջ եկաւ։

Յուդայի գերդաստանները ասոնք են. անոնց թուարկուածները եօթանասունվեց հազար հինգ հարիւր հոգի էին։

Իսաքարի որդիները՝ իրենց գերդաստաններով. Թովղայէ՝ Թովղայեաններուն գերդաստանը, Փուայէ՝ Փուայեաններուն գերդաստանը,

Յասուբէ՝ Յասուբեաններուն գերդաստանը, Սամրոնէ՝ Սամրոնեաններուն գերդաստանը յառաջ եկաւ։

Իսաքարի գերդաստանները ասոնք են. անոնց թուարկուածները վաթսունչորս հազար երեք հարիւր հոգի էին։

Զաբուղոնի որդիները՝ իրենց գերդաստաններով. Սարեդէ՝ Սարեդեաններուն գերդաստանը, Ելոնէ՝ Ելոնեաններուն գերդաստանը, Յաղէլէ՝ Յաղէլեաններուն գերդաստանը յառաջ եկաւ։

Զաբուղոնի գերդաստանները ասոնք են. անոնց թուարկուածները վաթսուն հազար հինգ հարիւր հոգի էին։

Յովսէփի որդիները Մանասէ ու Եփրեմ էին՝ իրենց գերդաստաններով։

Մանասէի որդիները. Մաքիրէ՝ Մաքիրեաններուն գերդաստանը յառաջ եկաւ, Մաքիր ծնաւ Գաղաադը, ու Գաղաադէ՝ Գաղաադեաններուն գերդաստանը յաոաջ եկաւ։

Ահա՛ւասիկ Գաղաադի որդիները. Իեզերէ՝ Իեզերեաններուն գերդաստանը, Քեղեգէ՝ Քեղեգեաններուն գերդաստանը,

Ասրիէլէ՝ Ասրիէլեաններուն գերդաստանը, Սիւքէմէ՝ Սիւքէմեաններուն գերդաստանը,

Սեմիդայէ՝ Սեմիդայեաններուն գերդաստանը, եւ Ոփերէ՝ Ոփերեաններուն գերդաստանը յառաջ եկաւ։

Ոփերի որդին՝ Սալպաադ որդիներ չունեցաւ, հապա միայն աղջիկներ։ Սալպաադի աղջիկներուն անունները՝ Մահալա, Նուա, Էգղա, Մեղքա ու Թերսա էին։

Մանասէի գերդաստանները ասոնք են. անոնց թուարկուածները յիսուներկու հազար եօթը հարիւր հոգի էին։

Ահա՛ւասիկ Եփրեմի որդիները՝ իրենց գերդաստաններով. Սուտաղայէ՝ Սուտաղայեաններուն գերդաստանը, Բոքորէ՝ Բոքորեաններուն գերդաստանը, Թահանէ՝ Թահանեաններուն գերդաստանը յառաջ եկաւ։

Ահա՛ւասիկ Սուտաղայի որդիները. ³Էրանէ՝ Էրանեաններուն՝՝ գերդաստանը յառաջ եկաւ։

Եփրեմի որդիներուն գերդաստանները ասոնք են. անոնց թուարկուածները երեսուներկու հազար հինգ հարիւր հոգի էին։ Յովսէփի որդիները ասոնք են՝ իրենց գերդաստաններով։

Բենիամինի որդիները՝ իրենց գերդաստաններով. Բաղայէ՝ Բաղայեաններուն գերդաստանը, Ասբէլէ՝ Ասբէլեաններուն գերդաստանը, Աքիրամէ՝ Աքիրամեաններուն գերդաստանը,

Սուփամէ՝ Սուփամեաններուն գերդաստանը, Ոփիմէ՝ Ոփիմեաններուն գերդաստանը յառաջ եկաւ։

Բաղայի որդիները՝ Արեդ ու Նէեման էին. Արեդէ՝ Արեդեաններուն գերդաստանը, Նէեմանէ՝ Նէեմանեաններուն գերդաստանը յառաջ եկաւ։

Բենիամինի որդիները ասոնք են՝ իրենց գերդաստաններով. անոնց թուարկուածները քառասունհինգ հազար վեց հարիւր հոգի էին։

Ահա՛ւասիկ Դանի որդիները՝ իրենց գերդաստաններով. Սուհամէ՝ Սուհամեաններուն գերդաստանը յառաջ եկաւ. Դանի գերդաստանները ասոնք են՝ իրենց գերդաստաններով։

Սուհամեաններուն բոլոր գերդաստաններուն թուարկուածները վաթսունչորս հազար չորս հարիւր հոգի էին։

Ասերի որդիները՝ իրենց գերդաստաններով. Յեմնայէ՝ Յեմնայեաններուն գերդաստանը, Յեսուիէ՝ Յեսուիեաններուն գերդաստանը, Բարիայէ՝ Բարիայեաններուն գերդաստանը։

Բարիայի որդիներէն Քաբերէ՝ Քաբերեաններուն գերդաստանը, Մեղքիէլէ՝ Մեղքիէլեաններուն գերդաստանը յառաջ եկաւ։

Իսկ Ասերի աղջիկին անունը Սարա էր։

Ասերի որդիներուն գերդաստանները ասոնք են. անոնց թուարկուածները յիսուներեք հազար չորս հարիւր հոգի էին։

Նեփթաղիմի որդիները՝ իրենց գերդաստաններով. Յասիէլէ՝ Յասիէլեաններուն գերդաստանը,

Գունիէ՝ Գունեաններուն գերդաստանը, Յասերէ՝ Յասերեաններուն գերդաստանը, Սիլլեմէ՝ Սիլլեմեաններուն գերդաստանը յառաջ եկաւ։

Նեփթաղիմի գերդաստանները ասոնք են՝ իրենց գերդաստաններով. անոնց թուարկուածները քառասունհինգ հազար չորս հարիւր հոգի էին։

Ասոնք էին Իսրայէլի որդիներուն թուարկուածները.— վեց հարիւր մէկ հազար եօթը հարիւր երեսուն հոգի։

Տէրը խօսեցաւ Մովսէսի՝ ըսելով.

«Ասո՛նց պիտի բաժնուի այն երկիրը՝ իբր ժառանգութիւն, իրենց անուններուն թիւին համեմատ։

Բազմաթիւ եղողին՝ շատ ժառանգութիւն տուր, ու փոքրաթիւ եղողին՝ քիչ ժառանգութիւն տուր. իւրաքանչիւրին իր թուարկումին համեմատ ժառանգութիւն պիտի տրուի։

Սակայն երկիրը վիճակով պիտի բաժնուի, եւ իրենց հայրերուն տոհմերուն անուններուն համեմատ պիտի ժառանգեն։

Վիճակին համեմատ պիտի բաժնուի իրենց ժառանգութիւնը՝ բազմաթիւ ու փոքրաթիւ եղողներուն միջեւ»։

Ահա՛ւասիկ Ղեւտացիներուն թուարկուածները՝ իրենց գերդաստաններով. Գերսոնէ՝ Գերսոնեաններուն գերդաստանը, Կահաթէ՝ Կահաթեաններուն գերդաստանը, Մերարիէ՝ Մերարեաններուն գերդաստանը յառաջ եկաւ։

Ահա՛ւասիկ Ղեւտացիներուն գերդաստանները.— Ղոբենեաններուն գերդաստանը, Քեբրոնեաններուն գերդաստանը, Մոհողեաններուն գերդաստանը, Մուսեաններուն գերդաստանը ու Կորխեաններուն գերդաստանը։

Կահաթ ծնաւ Ամրամը. Ամրամի կնոջ անունը Յոքաբեդ էր, Ղեւիի աղջիկը, որուն մայրը զայն Եգիպտոսի մէջ ծնաւ Ղեւիի։ Ան Ամրամի ծնաւ Ահարոնը, Մովսէսը, եւ անոնց քոյրը՝ Մարիամը։

Ահարոնի ծնան՝ Նադաբ, Աբիուդ, Եղիազար ու Իթամար.

բայց Նադաբ եւ Աբիուդ մեռան, երբ Տէրոջ առջեւ օտար կրակ կը մատուցանէին։

Ասոնցմէ թուարկուածները, այսինքն մէկ ամսականէն վեր եղող բոլոր արուները, քսաներեք հազար հոգի էին. արդարեւ անոնք Իսրայէլի որդիներուն հետ չթուարկուեցան, քանի որ Իսրայէլի որդիներուն մէջ անոնց ժառանգութիւն տրուած չէր։

Մովաբի դաշտերուն մէջ, Երիքովի դիմաց, Յորդանանի մօտ, Իսրայէլի որդիները թուարկող Մովսէսի ու Եղիազար քահանային թուարկածները ասոնք են։

Ասոնց մէջ բնաւ մարդ մը չկար Իսրայէլի որդիներուն նախապէս թուարկուածներէն, որ Մովսէս եւ Ահարոն քահանան Սինայի անապատին մէջ թուարկեցին։

Արդարեւ Տէրը անոնց համար ըսեր էր թէ “անշո՛ւշտ անապատին մէջ պիտի մեռնին”. ուստի անոնցմէ ո՛չ մէկ մարդ մնաց, բացի Յեփոնեան Քաղէբէ ու Նաւեան Յեսուէ։