Numbers 30

Leviticus  «  Numbers 29  ‹  Numbers 30  ›  Numbers 31  »  Deuteronomy

ՈՒԽՏԵՐՈՒ ՕՐԷՆՔՆԵՐ

Մովսէս Իսրայէլի որդիներուն ¹տոհմապետներուն խօսեցաւ՝ ըսելով.

«Ահա՛ւասիկ ինչ որ Տէրը պատուիրեց. եթէ մարդ մը Տէրոջ ուխտ ընէ, կամ երդում ընելով ²պարտաւորութիւն մը ստանձնէ՝՝, իր խօսքը թող չդրժէ. իր բերանէն ելած ամէն խոստում թող գործադրէ։

Եթէ կին մը Տէրոջ ուխտ ընէ եւ պարտաւորութիւն մը ստանձնէ իր երիտասարդութեան ատեն՝ իր հօր տան մէջ,

ու անոր հայրը լսէ անոր ուխտը եւ անոր ստանձնած պարտաւորութիւնը, բայց անոր հայրը լռէ անոր հանդէպ, անոր բոլոր ուխտերը պիտի հաստատուին. նաեւ անոր ստանձնած ամէն պարտաւորութիւն պիտի հաստատուի։

Իսկ եթէ անոր հայրը մերժէ անոր ուխտը՝ իր լսած օրը, անոր ուխտերէն եւ անոր ստանձնած պարտաւորութիւններէն ո՛չ մէկը պիտի հաստատուի, ու Տէրը անոր պիտի ներէ, քանի որ անոր հայրը մերժած է անոր ուխտը։

Եթէ ամուսին ունի՝ ուխտ ըրած կամ իր շրթունքէն ³ստանձնումի անխոհեմ խօսք մը ելած ատեն,

ու անոր ամուսինը լսէ եւ անոր հանդէպ լռէ իր լսած օրը, անոր ուխտերը պիտի հաստատուին. նաեւ անոր ստանձնած պարտաւորութիւնները պիտի հաստատուին։

Բայց եթէ անոր ամուսինը մերժէ անոր ուխտը՝ իր լսած օրը, անոր ըրած ուխտն ու շրթունքէն ելած ստանձնումի անխոհեմ խօսքը պիտի խզէ, եւ Տէրը անոր պիտի ներէ։

Բայց այրիի մը կամ վռնտուած կնոջ մը ուխտը — ստանձնուած որեւէ պարտաւորութիւն — պիտի հաստատուի իրեն համար։

Եթէ ան իր ամուսինին տան մէջ ուխտ ըրած է, կամ երդումով պարտաւորութիւն մը ստանձնած է,

եւ անոր ամուսինը՝ լսած ըլլալով՝ անոր հանդէպ լռած է ու մերժած չէ անոր ուխտը, անոր բոլոր ուխտերը պիտի հաստատուին. նաեւ անոր ստանձնած ամէն պարտաւորութիւն պիտի հաստատուի։

Բայց եթէ անոր ամուսինը զանոնք խզած է իր լսած օրը, ուխտ ընելու կամ ստանձնումի համար անոր շրթունքէն ելած ոչինչ պիտի հաստատուի, քանի որ անոր ամուսինը զանոնք խզած է, ու Տէրը անոր պիտի ներէ։

Անոր ամուսինը կրնայ հաստատել կամ անոր ամուսինը կրնայ խզել ամէն ուխտ եւ ինքզինք ⁴խոնարհեցնելու համար ստանձնուած ամէն երդում։

Եթէ անոր ամուսինը անոր հանդէպ լռէ օրէ օր, հաստատած կ’ըլլայ անոր բոլոր ուխտերն ու անոր ստանձնած բոլոր պարտաւորութիւնները. զանոնք հաստատած կ’ըլլայ, քանի որ անոր հանդէպ լռած է իր լսած օրը։

Բայց եթէ իր լսած օրէն ետք որեւէ կերպով զանոնք խզէ, ի՛նք պիտի կրէ անոր անօրէնութիւնը»։

Մարդու մը եւ անոր կնոջ միջեւ, ու հօր մը եւ երիտասարդութեան ատեն իր հօր տունը բնակող աղջիկին միջեւ պահուելիք կանոնները ասո՛նք են, որ Տէրը Մովսէսի պատուիրեց։