Numbers 32

Leviticus  «  Numbers 31  ‹  Numbers 32  ›  Numbers 33  »  Deuteronomy

ՅՈՐԴԱՆԱՆԻ ԱՐԵՒԵԼՔԸ ԳՏՆՈՒՈՂ ՏՈՀՄԵՐԸ (Բ. Օր. 3. 12-22)

Գադի որդիները եւ Ռուբէնի որդիները յոյժ շատ խաշինք ունէին. տեսան Յազերի երկիրն ու Գաղաադի երկիրը, եւ ահա՛ այդ տեղը խաշինք պահելու յարմար տեղ մըն էր։

Ուստի Գադի որդիներն ու Ռուբէնի որդիները գացին եւ Մովսէսի, Եղիազար քահանային ու համայնքի իշխաններուն ըսին.

«Ատարովթ, Դեբոն, Յազեր, Նամրա, Եսեբոն, Եղէաղէ, Սեբամա, Նաբաւ եւ Բէան,

այսինքն Տէրոջ Իսրայէլի համայնքին առջեւ զարկած երկիրը, խաշինք պահելու յարմար երկիր մըն է, ու քու ծառաներդ խաշինք ունին»։

Ուստի ըսին. «Եթէ մենք ¹առջեւդ շնորհք գտանք, այս երկիրը քու ծառաներուդ թող տրուի իբր կալուած. մեզ Յորդանանէն մի՛ անցըներ»։

Մովսէս Գադի որդիներուն եւ Ռուբէնի որդիներուն ըսաւ. «Ձեր եղբայրները պատերազմի երթան, իսկ դուք հո՞ս կենաք։

Ինչո՞ւ Իսրայէլի որդիներուն սիրտը կը բեկանէք, որ չանցնին այն երկիրը՝ որ Տէրը անոնց տուած է։

Ձեր հայրերը ա՛յսպէս ըրին, երբ զանոնք Կադէս-Բառնեայէն ղրկեցի՝ երկիրը տեսնելու համար։

Արդարեւ անոնք մինչեւ Եսքողի ձորը բարձրացան ու երկիրը տեսան, եւ Իսրայէլի որդիներուն սիրտը բեկանեցին, որպէսզի չմտնեն այն երկիրը՝ որ Տէրը անոնց տուեր էր։

Նոյն օրը Տէրոջ բարկութիւնը բորբոքեցաւ ու երդում ըրաւ՝ ըսելով.

“Եգիպտոսէն բարձրացած մարդիկը — քսան տարեկանէն վեր եղողները — բնա՛ւ պիտի չտեսնեն այն ²երկիրը, որ երդումով խոստացայ Աբրահամի, Իսահակի եւ Յակոբի. քանի որ լման չհետեւեցան ինծի,

բացի Կենեզեան Յեփոնէի որդիէն՝ Քաղէբէ, ու Նաւէի որդիէն՝ Յեսուէ, որոնք լման հետեւեցան Տէրոջ”։

Տէրոջ բարկութիւնը Իսրայէլի դէմ բորբոքեցաւ, ու զանոնք քառասուն տարի անապատին մէջ թափառեցուց, մինչեւ որ Տէրոջ առջեւ չարիք գործող ամբողջ սերունդը սպառեցաւ։

Եւ ահա՛ դուք, մեղաւոր մարդոց շառաւիղներ, ձեր հայրերուն տեղը կանգնած էք, որպէսզի Իսրայէլի դէմ Տէրոջ բորբոքած բարկութիւնը դարձեալ աւելցնէք։

Արդարեւ եթէ դուք անկէ հեռանաք, ան ալ դարձեալ այս ժողովուրդը անապատին մէջ պիտի ձգէ, ու դուք այս ամբողջ ժողովուրդը պիտի բնաջնջէք»։

Անոնք մօտեցան անոր եւ ըսին. «Մենք հոս փարախներ պիտի կառուցանենք մեր խաշինքին համար, ու քաղաքներ՝ մեր մանուկներուն համար։

Բայց մենք արտորալով պիտի զինուինք եւ Իսրայէլի որդիներուն առջեւէն երթանք, մինչեւ որ զանոնք իրենց տեղը տանինք. իսկ մեր մանուկները պարսպապատ քաղաքներուն մէջ պիտի մնան՝ երկրին բնակիչներուն ³պատճառով։

Մինչեւ որ Իսրայէլի որդիներէն իւրաքանչիւրը իր ժառանգութիւնը չժառանգէ, մենք մեր տուները պիտի չվերադառնանք.

արդարեւ մենք անոնց հետ պիտի չժառանգենք Յորդանանի միւս կողմը, աւելի անդին, որովհետեւ մեր ժառանգութիւնը մեզի ⁴տրուած է Յորդանանի ա՛յս կողմը, դէպի արեւելք»։

Մովսէս անոնց ըսաւ. «Եթէ սա՛ բանը ընէք, եթէ Տէրոջ առջեւ զինուիք պատերազմի համար,

ու բոլորդ զինուած՝ Յորդանանէն անցնիք Տէրոջ առջեւ, մինչեւ որ ան իր թշնամիները իր առջեւէն վտարէ

եւ այն երկիրը Տէրոջ առջեւ նուաճուի, ու յետոյ վերադառնաք, Տէրոջ առջեւ եւ Իսրայէլի առջեւ անմեղ պիտի ըլլաք ու այս երկիրը Տէրոջ առջեւ ձեր կալուածը պիտի ըլլայ։

Բայց եթէ այսպէս չընէք, ահա՛ Տէրոջ դէմ մեղանչած կ’ըլլաք, եւ գիտցէ՛ք թէ ձեր մեղքը ձեզ պիտի գտնէ։

Ձեր մանուկներուն համար քաղաքներ կառուցանեցէ՛ք, ու ձեր ոչխարներուն համար՝ փարախներ. բայց ձեր բերանէն ելած խոստումը գործադրեցէ՛ք»։

Գադի որդիները եւ Ռուբէնի որդիները խօսեցան Մովսէսի՝ ըսելով. «Ծառաներդ մեր տիրոջ պատուիրածին համաձայն պիտի ընենք։

Մեր մանուկները, մեր կիները, մեր խաշինքն ու մեր բոլոր անասունները հո՛ս՝ Գաղաադի քաղաքներուն մէջ թող ⁵մնան։

Բայց ծառաներդ՝ մեր տիրոջ ըսածին համաձայն, բոլորս ալ՝ զինուորութեան համար զինուած՝ Տէրոջ առջեւ պիտի անցնինք պատերազմի համար»։

Հետեւաբար Մովսէս անոնց մասին պատուէր տուաւ Եղիազար քահանային, Նաւէի որդիին՝ Յեսուի, եւ Իսրայէլի որդիներուն տոհմերու նահապետներուն.

Մովսէս անոնց ըսաւ. «Եթէ Գադի որդիներն ու Ռուբէնի որդիները՝ բոլորն ալ պատերազմի համար զինուած՝ Տէրոջ առջեւ Յորդանանէն անցնին ձեզի հետ, եւ այն երկիրը ձեր առջեւ նուաճուի, Գաղաադի երկիրը անո՛նց տուէք իբր կալուած։

Բայց եթէ զինուած չանցնին ձեզի հետ, Քանանի երկրին մէջ պիտի ստանան իրենց կալուածը՝ ձեզի հետ»։

Գադի որդիներն ու Ռուբէնի որդիները պատասխանեցին. «Տէրը քու ծառաներուդ ի՛նչպէս պատուիրեց, ա՛յնպէս պիտի ընենք։

Մենք՝ զինուած՝ Քանանի երկիրը պիտի անցնինք Տէրոջ առջեւ, որպէսզի մեր ժառանգութեան կալուածը Յորդանանի ա՛յս կողմը ըլլայ»։

Ուստի Մովսէս անոնց — այսինքն՝ Գադի որդիներուն, Ռուբէնի որդիներուն եւ Յովսէփեան Մանասէի կէս տոհմին — տուաւ Ամորհացիներու Սեհոն թագաւորին թագաւորութիւնը ու Բասանի Ովգ թագաւորին թագաւորութիւնը, երկիրը՝ իր քաղաքներով ու երկրին քաղաքներուն շրջակայ հողամասերով։

Գադի որդիները կառուցանեցին Դեբոնը, Ատարովթը, Արոէրը,

Ատրոթ-Սովփանը, Յազերը, Յոգբեհան,

Բեթնամրան ու Բեթարանը — պարսպապատ քաղաքներ —, նաեւ ոչխարներու փարախներ։

Ռուբէնի որդիները կառուցանեցին Եսեբոնը, Եղէաղէն, Կարիաթեմը,

Նաբաւը եւ Բահաղ-Մէոնը — որոնց անունները փոխուեցան —, նաեւ Սեբաման, ու իրենց կառուցանած քաղաքները իրենց ⁶անուններով կոչեցին։

Մանասեան Մաքիրի որդիները Գաղաադ գացին, զայն գրաւեցին, եւ անոր մէջ բնակող Ամորհացիները վտարեցին։

Մովսէս Գաղաադը տուաւ Մանասեան Մաքիրի, եւ ան հոն բնակեցաւ։

Մանասեան Յայիր գնաց, անոնց գիւղաքաղաքները գրաւեց, ու զանոնք ⁷Հաւոթ-Յայիր՝՝ կոչեց։

Իսկ Նոբահ գնաց, Կանաթը եւ անոր գիւղերը գրաւեց, ու զայն Նոբահ կոչեց՝ իր անունով։