Ruth 3

Judges  «  Ruth 2  ‹  Ruth 3  ›  Ruth 4  »  1 Samuel

ՀՌՈՒԹ ԿԸ ԳՏՆԷ ԱՄՈՒՍԻՆ ՄԸ

Հռութի կեսուրը՝ Նոյեմի անոր ըսաւ. «Աղջի՛կս, քեզի ¹տուն մը չփնտռե՞մ, որպէսզի քեզի բարիք ըլլայ։

Հիմա Բոոս մեր ծանօթներէն չէ՞, որուն սպասուհիներուն քով էիր. ահա՛ անիկա այս գիշեր կալին մէջ գարին պիտի հոսէ։

Ուստի լուացուէ՛, հոտաւէտ իւղո՛վ օծուէ, հանդերձնե՛րդ ²հագիր եւ կա՛լը իջիր. մինչեւ որ ուտելն ու խմելը չաւարտէ, դուն քեզ այդ մարդուն մի՛ ճանչցներ։

Երբ պառկի, հասկցի՛ր անոր պառկած տեղը. ապա գնա՛, անոր ոտքերուն կողմէն ծածկո՛ցը բաց, ու պառկէ՛։ Ինք քեզի պիտի իմացնէ թէ ի՛նչ ընելու ես»։

Հռութ անոր ըսաւ. «Ամէն ինչ որ ինծի ըսիր՝ պիտի ընեմ»։

Կալը իջաւ, եւ կեսուրին իրեն ամբողջ պատուիրածին համաձայն ըրաւ։

Երբ Բոոս կերաւ, խմեց ու սիրտը զուարթացաւ, գարիի դէզին ծայրը պառկելու գնաց։ Հռութ ալ կամաց մը գնաց, անոր ոտքերուն կողմէն ծածկոցը բացաւ եւ պառկեցաւ։

Կէս գիշերին մարդը սարսռաց. դարձաւ, ու տեսաւ թէ ահա՛ իր ոտքերուն կողմը կին մը պառկած էր։

Ուստի ըսաւ. «Դուն ո՞վ ես»։ Ան պատասխանեց. «Ես քու աղախինդ՝ Հռութն եմ. քու քղանցքդ աղախինի՛դ վրայ տարածէ, քանի դուն մօտ ³ազգականս ես»։

Ինք ալ ըսաւ. «Դուն Տէրոջմէն օրհնեա՜լ ըլլաս, աղջի՛կս. քու վերջին կարեկցութիւնդ՝ նախկինէն աւելի մեծ է, որովհետեւ չքաւոր կամ հարուստ երիտասարդներու ետեւէն չգացիր։

Հիմա, աղջի՛կս, մի՛ վախնար. քեզի պիտի ընեմ ամէն ինչ որ ինծի ըսես, քանի որ իմ ⁴քաղաքիս ամբողջ ժողովուրդը՝՝ գիտէ թէ դուն առաքինի կին մըն ես։

Հիմա ես իրապէս քու ազգականդ եմ, բայց ուրիշ ազգական մըն ալ կայ՝ ինձմէ աւելի մօտ։

Այս գիշեր հոս ⁵կեցիր. եթէ առտուն ան քեզ փրկէ, լա՛ւ, թող փրկէ։ Բայց եթէ քեզ փրկելէն չախորժի, ե՛ս քեզ պիտի փրկեմ. Տէրը կ’ապրի՛։ Մինչեւ առտու հոս պառկէ»։

Ուստի մինչեւ առտու անոր ոտքերուն կողմը պառկեցաւ, ու երբ դեռ կարելի չէր զիրար ճանչնալ՝ կանգնեցաւ։ Բոոս ըսաւ. «Թող չգիտցուի թէ կալին մէջ կին մտեր է»։

Նաեւ ըսաւ. «Վրայի ծածկոցդ բե՛ր, ու զայն բռնէ՛»։ Հռութ զայն բռնեց, ինք ալ վեց չափ գարի չափեց եւ անոր վրայ դրաւ, ու քաղաք գնաց։

Երբ Հռութ իր կեսուրին քով հասաւ, ան ըսաւ. «⁶Ի՞նչպէս ես՝՝, աղջի՛կս»։ Ինք ալ անոր պատմեց ամէն ինչ որ այդ մարդը իրեն ըրեր էր,

եւ ըսաւ. «Ինծի այս վեց չափ գարին տուաւ՝ ըսելով. “Քու կեսուրիդ պարապ մի՛ երթար”»։

Նոյեմի ըսաւ. «Աղջի՛կս, կեցի՛ր, մինչեւ որ գիտնաս թէ այս խնդիրը ի՛նչպէս պիտի ⁷լրանայ. արդարեւ այդ մարդը պիտի չհանդարտի, մինչեւ որ այս խնդիրը այսօր չաւարտէ»։